Misissuinissaq Amnestymit naammagineqanngeqaaq

Dansk Center for Internationale Studier, DIIS-ip, Isertortumik Paasiniaasartut, CIA-p, Kalaallit Nunaata silaannartaatigoortarsimanerarneqagaanera pillugu misissuinissaata piviusunngulerunarnera Inuttut pisinnaatitaaffinnik Danmarkimi ikiuiniaqatigiiffimmit, Amnesty Internationalimit, naammagineqanngeqaaq.
Allattoq Carla Davidsen
novembarip 09-at 2011 06:52

- Tamanna naammaginanngeqaaq, suliniaqatigiiffik nutaarsiassaqartitsivimmut Ritzauimut oqarpoq.

Amnesty isumaqarpoq, timmisartuussisarsimaneragaanerit ilumoortortaqarnersut paasisaqarfiginissaannut misissuinissat killeqarpallaartut.

- Danmarkimi naalakkersuisut sukumiisumik misissuinissaminnut periarfissaqarlutik affaannarmik iliuuseqarniarnerat pakatsinarpoq, Julia Hall, Amnesty Internationalimeersoq, nutaarsiassaqartitsivimmut Ritzauimut oqarpoq.

Julia Hallip isornartorsiorpaa, allakkiat uppernarsaatit, misissorneqareersut kisiisa DIIS-ip takusinnaassammagit, paasissutissanik nutaanik immaqa peqaraluartoq. Aamma naammagittaalliutigaa Kalaallit Nunaat kisimi misissuivigineqarniarmat, nunat allat immaqa ilaagaluartut.

- Misissuisussat paasissutissanik nutaanik ujarlernissaat naalakkersuisut pituttorpaat. Oqartussaasut paasissutissanik taamaalillutik  isertuussisinnaapput, Julia Hall oqarpoq.

Danmarkimi naalakkersuisut Amnesty Internationalip kimigiiserfigiuarniarpai, nunallu EU-mut ilaasortat taamaalioqqullugit aamma kaammattorniarlugit.