Misissuinisat nutaanik ilisimasaqalersitsissapput
Silap pissusaata allanngoriartornera pillugu, taassumalu Issittumi naasunut uumasunullu sunniutai pillugit, danskit kalaallillu suleqatigiillutik misissuinissamik ingerlatassaat nutaanik ilisimasaqalersitsissaaq. Aamma taamaalilluni silap pissusaata allanngoriartornerata Kalaallit Nunaannut aamma nunarsuarmut tamarmut qanoq sunniutissaata siumut oqaatiginissaa ajornannginnerulissaaq.
Ingerlataq 2007-imi upernaakkut aallartissaaq, Nuup eqqaani Nuullu Kangerluani. Matumani aamma silap kissassusia, anorit, apisarnera, seqernup qinngorneri aamma naasoqassuseq silap pissusaatalu allanngoriartornerata Issittumi pissutsinut qanoq sunniuteqartarnera takuneqarsinnaalissapput. Aamma Nuup Kangerluata imermik pilersornera, saarulleeranngortussat amerlassusiat, qanoq tuttoqartiginera aamma silaannarmi pissutsit allat arlaqartut, Kalaallit Nunaata eqqaani nunami imaanilu uuttortarneqassapput.
Ingerlataq pilersinneqarnermini 7,3 mio. kr.-it missaannik akeqassaaq taakkulu amerlaqataannik ukiumut akeqartassalluni. Namminersornerullutik Oqartussanit, danskit Miljøministerieqarfianit aamma Aage V. Jensens Fond-mit akilerneqartassalluni.
