Naalakkersuisut siulittaasuat, Kim Kielsen, ullumikkut killiffik pillugu katersortitsinermi kisimiippoq.Assi: KNR

Misissuinernik nutaanik ullumikkut akissuteqartoqanngitsoq

Nunatsinni tunillatsissimasup siulliup paasineqarneranit ullut 14-it qaangiupput. Inuit qulit tunillatsissimasut paasineqarnikuupput.

Coronamut misissorneqartunit nutaanik ullumikkut akissutissaqanngilaq. Taamaammat coronavirusimik tunillatsissimasutut paasineqartut Nuummi suli quliinnaapput - inuillu 402-t nunatsinneersut misissorneqarsimallutik.

Tunillanneqarsimasunit marluk peqqissereerput.

Sapaatip-akunnerata siuliani tunillatsissimasut nutaat arfinillit - tamarmik Nuummiittut paasineqarput.

AAMMA ATUARUK Pisisartut imigassamik matusinermut: Kingunerlutsitsisoqarsinnaavoq, eqqissiviilliortoqalissaaq - isumatusaarneruvorlu

Kim KIelsen taamaakkaluartoq imminut tatigerpalaarluni tusagassiortunut ullumi sassarpoq:

- Tunillaassuunnerup siaruatsaalinissaa iluatsipparput. Tunillanneqarsimasut tamarmik pissutsit taamaatsillugit ajunngillat, taanna oqarpoq.

Isumalluarpallaalernissamulli pissutissaqanngilaq- tassami nunani nunatta ungataaniittuni inuppassuit coronavirusumik tunillanneqarsimapput.

- Suli tunuarsimaartariaqarpugut. Nunat saniligut qiviariartsigit isigeriartigulu tunillanneqarsimasut qanoq amerlatigisut. Taamaammat nunanut allanut angalanisamut suli killilersuisoqasaaaq - naammagittartariaqarpugut, Kim Kielsen Namminersorlutik Oqartussat tusagassiortunut inaataanniit oqarpoq.

Imigassanik inerteqquteqarneq, nakuuserneq erngunnerlu

Naalakkersuisut arfininngormat tassangaannartumik nalunaaruteqarput: Imigassanik tuniniaaneq tamarmi erngertumik unitsinneqarpoq.

Kim Kielsenip oqarnera naapertorlugu meeqqat ilaqutariinni atugarliortuni meeqqat eqqarsaatigineqarpoq - aammali inuit ilaat angerlarsimaffimminni suli festertarnerat pissutaavoq. Festernermilu tuniluuttoqarnissaanut aarlerinartorsiortitsisoqarpoq.

Polititmesterip, Bjørn Tegner Bayip oqarnera naapertorlugu politiit arfininngornerup unnuaani imigassartornerup kingunerisaanik angerlarsimaffimmi eqqissiviilliortunut arfinileriarlutik orniguttariaqarsimapput - tamannalu coronap ajornartorsiortitsilinnginnerata siornatigut pisartut amerlaqatigiinnangajappaa.

AAMMA ATUARUK Tamaat isigalugu: Coronavirus pillugu killiffik

Naak inuit qulinit amerlanerusut katersuunnissaat inuillu imminnut 2 meterinit qaninnerunissaat inerteqqutigineqaraluartoq inuit ilaat pisarnermisulli erngutiinnarput. 

- Suli festertoqartartoq takusinnaavarput. Nakuusertoqartarpullu. Pisut taakku pisariaqartinngilagut, taammaammat imigassamik tuniniaaneq unitsipparput. Inuit ilaat suli ernguterujussuartarmata.

"Kommunit akisussaaffeqartut"

Nuummilu ilaqutariinnut meerartalinnut atornerluisunut uteqqeriarutta, tassa inersimasut imigassamik pisisinnaajunnaarnerannut. 

Taakku qanoq isumagineqassappat? Tamanna Unicefip MIO-llu ilaatigut apeqqutigaat.

- Tamanna kommuninut apeqqutaavoq, Naalakkersuisut siulittaasuat naatsumik erseqqissumik akissuteqarpoq.

Kommunit arlaatigut oqaloqatigiissuteqarfigineqarpat?

- Kommunit tallimat tamarmik imigassamik tuniniaanerup unitsinneqarnissaa kissaatigisaraat, Kielsen akissuteqarpoq.

Sermersuup Kommuniani ksiimi imigassamik inerteqquteqartoqarlerpoq. Sooruna nunap sinnerani taamaattoqanngitsoq?

- Nuummi inuit qulit tunillatsissimapput. Taamaammat nunap sinnerani tuniniaanerup unitsinnissaa naleqqutinngilaq, Kim Kielsen oqarpoq.

Isummersuutit