Misissuineq: Suut arnat timersornermi aporfigalugillu iluaqutigaat?

Inuiaqatigiit akornanni timersorneq pillugu ilisimatusarnermi kandidatinngorniaq Apollonie Kreutzmann GIF suleqatigalugu arnat timersortarnerannik Nuummi misissuilerpoq.
Allattoq Noah Mølgaard
oktobarip 12-at 2020 12:13

Nunatsinni timersornermi arnat ikinnerussuteqarput. Idrættens analyse institutip 2015-mi 2020-milu misissuinerani tamanna erserpoq.

Maanna oqallinnikkut arnat timersornermi peqataanerulernissaat siuarsarniarneqalerpoq. Sammisamut tunngasumik oqaloqatigiittartut pilersinneqarnerisigut arnat timersotartut aamma timersorneq ajortut apersorneqassapput.

Misissuineq Apollonie Kreutmannimit suliarineqarpoq

- Timersoqatigiiffiit tallimaagaangata ataaseq (20 procent) arnartaqanngingajattarpoq arnaqaraniluunniit
- Arnat nammineq kajumissutsimik suleqataanerat: Quliungaagata pingasut arnaasarput
Tusarfik: Idræt i Grønland - Idrættens analyseinstitut

- Pingaarnertut anguniagaavoq arnat Nunatsinni timersortarnerisa oqallisigineqarnissaa. Aamma neriuutigaarput arnat timersortalerusukkaluarlutik nalornisut misissuineq pissarsiaqarfigisinnaassagaat, Apollonie Kreutzmann KNR-mut oqarpoq.

Paquminartut

Misissuineq suliffeqarfimmi misissuineruvoq Inuiaqatigiit akornanni timersorneq pillugu ilisimatusarnermi ilinniakkamut atatillugu, soraarummeerusiarlu Apollonie Kreutzmannip januarimi illersussavaa.

Angusat aaqqiissutissatullu siunnersuutit Apollonie Kreutzmannip Kalaallit Nunaanni timersoqatigiit kattuffiannut tunniutissavai arnat timersortarnerisa siuarsarnissaanut sakkussatut.

- Facebookimi aamma gruppeliortoqarsinnaavoq timersornermi arnat misilittakkaminnik paarlaasseqatigiittarfigisinnaasaannik, Apollonie Kreutzmann oqarpoq.

- Tassa saqqummiunneqartarsinnaapput arnat sungiusarnerminni aporfiusinnaasut qanoq ilillutik qaangersimaneraat. Aamma eqqaamassavarput timersoriaatsit assigiinngeqimmata. Ilaat ataatsimoorluni timersornermik nuannarisaqarnerupput allat ataasiakkaarluni timersorneq iluarinerusaraat, Apollonie Kreutzmann oqarpoq.

- Sorpassuit oqaluuserinissaannut aamma periarfissaqartariaqarpoq. Imaassinnaavoq arnat ilaasa timimik oqaluuserinissaat paqumigisaraat imaluunniit allanik peqquteqarlutik timersorneq ajortut. Misilittakkanik paarlaasseqatigiinnikkut timersornissamut nangaasut ikiorneqarsinnaapput, Apollonie Kreutzmann oqarpoq.

Misissuinermut atatillugu oqaloqatigiittartuni peqataasussat pissarsiarineqarput taakkulu tassaapput arnat timersortartut aamma timersorneq ajortut.

- Misissuineq maanna Nuummi aallartippoq kingusinnerusukku Nunatta sinnerani aamma misissuisoqarsinnaavoq, Apollonie Kreutzmann naggasiivoq.