Misissuineq suli aallartinneqanngilaq

CIA-p timmisartuussisarsimaneranut atatillugu misissuinerup aappaagu maajip aallaqqaataani naammassineqareersimanissaa, Danmarkip Kalaallit Nunaatalu isumaqatigiissutigereeraluaraat, Nunanut allanut tunngasunik Danmarkimi ilisimatusarfik, DIIS, Danmarkip nunanut allanut tunngassunut ministereqarfianit suli attavigineqarsimanngillat.
Allattoq Mads Lynge
novembarip 23-at 2011 13:21

Nunanut allanut tunngasunut ministereqarfik KNR-imut ullumi taama ilisimatitsivoq.

DIIS-ip Kalaallit Nunaat sinnerlugu misissuinissaa pillugu Danmarkip nunanut allanut tunngasunut ministereqarfiata piumasaqarfigissagaa, Nunanut allanut tunngassunut ministerip Villy Søvndalip, Naalakkersuisullu siulittaasuata Kuupik Kleistip qaammatip matuma aallartinnerani isumaqatigiissutigaat.

Danmarkimi naalakkersuisut matumani inissisimaffiat, DIIS-ip aamma misissortussaavaa.

Misissuinerup aaqqissuunneqarnissaa pillugu, DIIS Nunanut allanut tunngasunut ministereqarfimmit pisortatiguunngikkaluamik attavigineqarsimasoq, Nunanut allanut tunngasunut ministereqarfiup oqaatigaa, misissuinissamillu qinnuteqaat pisortatigoortoq, ministereqarfimmit sapaatip-akunnerata tulliani tunniunneqarumaartoq oqaatigineqarluni.

Pisortatigoortumillu suli qinnuteqartoqarsimanngimmat DIIS oqaaseqarumanngikkallarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq