Misissuineq nutaaq: Inuusuttuaqqat imminut toquttartut amerlanerusut
Tassami inuusuttut suli 20-liisimanngitsut imminut toquttartut amerliartuinnartut kisitsisit nutaat takutippaat, allaammi qulit tikillugit ukiullit imminut toquttartut misissuinerup nutaap takutippaa.
- Kisitsisit qimerluualaarutsigit takusinnaavarput imminut toquttut inuusunneruleriartortut, inuusuttullu imminut toquttartut amerliartuinnartut, tamanna maluginiarparput, Christina Viskum Lytken Larsen, inooqatigiit pissusaannik ilisimatusarsimasoq, innuttaasut peqqissusaannik misissuisarfimmit Statens Institut for Folkesundhedimeersoq, oqarpoq.
Toqussutaasimasut allattorsimaffii 1970-imit 2011-moortut misissuinermi tunuliaqutaapput.
1980-imit 1989-imut inunngorsimasut akornanni qulit 14-illu akornanni ukiullit 17-it imminut toqussimasut kisitsisit takutippaat.
AAMMA ATUARUK Qulaarpaa: imminut toquttarneq qanoq pinaveersaartinneqassava?
Inuiaqatigiinni ineriartornerup sukkavallaarnera pissutaaqataasinnaasoq
Kisitsisit utoqqaanerulaanut tunngasut aamma takutippaat 1980-imit 1989-imut inunngorsimasut affaasa missaat suli 20-liitinnatik imminut toqussimasut.
Meeqqat inuusuttullu amerliartuinnartut sooq imminut toquttarnersut nalunaarusiami nutaami nassuiaatigineqanngilaq.
Inuiaqatigiinni ineriartornerup ilaatigut sukkavallaarnera pissutaaqataasinnaasoq, Christina Viskum Lytken Larsenip oqaatigaa.
- Ineriartorneq sukkasimaqaaq. Aalisartuunermiit piniartuunermiillu nalitsinni pissutsinut ikaarsaarnermi ajornartorsiutit amerligaluttuinnarsimapput, imigassamik atornerluinermik kinguaassiuutinillu atornerluinerit ajoraluartumik amerliartuinnarsimallutik, Christina Viskum Lytken Larsen nassuiaavoq.
