MISISSUINEQ: iPadinik suliniut internettimut politikkimik allanngortitsilluinnarsinnaavoq
Qanoq iliussanerluni ilisimaqqissaaraanni, nunap internettimut politikkianik ilusilersuisoqarsinnaava? Villumfondip, Veluxfondimut ilaasup, koruunit millionit 17-it nalinginut nunatsinni kommunit affaanni atuartunut tamanut iPadinik tunissuteqarniarluni aalajangerneranut ilaatigut qaraasiaaqqat tamarmik internettimut attaveqarnissaannik piumasaqaateqarnermut suna tunuliaqutaarpiarnersoq aningaasaateqarfiup siulersuisuisa kisimik nalunngilaat.
Immaqa danskit aningaasaarteqarfiata illoqarfiit pingaarnersaata avataani kommunit meerartaannik ikiorusuppai, imaluunniit internettip kalaallinut tamanut akikillineqarnissaa anguniarsaraat?
Maannakkorpiaq ajornartorsiutigineqartoq tassaavoq kommunit suliniummut peqataasut marluusut atuartut internettimik atuinerannut akissaqannginnerat. Taamaammat naalakkersuisup Steen Lyngep politikkikkut aaqqiissuteqarnissaannik piumasaqarput. Atuartumut ukiumut internettimut akip annertunerpaaffilerneqarnissaanik piumasaqarput - atuartumut ataatsimut ukiumut koruunit 500-t - kommuninilu marluusut tamarmik immikkut atuartunut internettimut aningaasartuutigisassaat koruuninik millioninik 1,5-inik annertussuseqassapput.
TELE-POST, innutaasunut nalinginnaasumik atugassarititaasut malillugit qarasaasiaaqqanut 3.000-inut internettimik tunisissaguni, nalunaarasuartaateqarnermut suliffeqarfiup namminersorlutik oqartussanit pigineqartup tamanna iluanaarutigingaatsiassagaluarpaa. Tusarfiullu Radioaviisimut oqaluttuarnera malillugu, TELE-POST borgmesterit Hermann Berthelsen Jørgen Wæver Johansenilu koruunit millionit 18-it pallillugit akiligassaannik nassissinnaassagaluarpai.
TELEPOST namminersorlutik oqartussat suliffeqarfiisa iluanaaruteqarfiunerpaartaasa ilagaat. Nioqqutissaataasa nuannarineqarluartorpassuit akileraarutit suli ilanngaatiginagit koruuninik millioninik 103-nik siorna iluanaarutigineqarput. Tamannalu pissutigerpiarlugu sapaatita akunnerini arlalinngortuni pissaaneqarniuttoqarpoq.
Atorfilittat ullumi tallimanngornermi ataatsimiinnissaanni, attaveqarnermut naalakkersuisup Steen Lyngep, atuartut Ipadiinut internettimut akeqanngitsumut ilusiliat pingasut isummerfigissavai:
- Atuartut qarasaasiaasa internetternerinut akiligassaq TELE-POST-ip sinneqartoorutaanit akilerneqassava, teknologiilu sullitanut allanut aamma atorneqartoq atorneqaannarluni?
- Aningaasaateqarfiup suliniutaani atuartut pineqartut, qaammammut Tusassitut ittumik datamut annertussusileriikkamik akikitsumik tunineqassappat, atuivallaarnerannullu nammineq akiliisillugit?
- Imaluunniit atuartunut 3.000-inut Ipadit atuarfiit attaveqaataannut maanna atorneqartumut, Attammut, atassuserneqassappat taamaliornikkullu killilimmik attaveqartillugit, qarasaasiaaqqallu atorlugit ilinniakkerisinnaanngorlugit killeqanngitsumilli internettersinnaatitaatinnagit?
Aaqqiissutissaq kingulleq atorneqassagaluarpat, TELE-POST suliffeqarfiilluunniit allat qeqqata kujataatalu illoqarfiini nunaqarfiinilu antenninik wifi-hotspotsinillu annertusaasariaqassapput.
Kommunit Ipadit internetterutiginerinut annertunerpaaffissatut akiliutigisassatut siunniussaannik TELE-POST akuerserusunnersoq, taamatullu namminersorlutik oqartussat ukiormanna sinneqartoorutinik pissarsiassaasa ikinnerulernissaat apeqqutaaginnaraluarpoq. Maannali aamma malittarisassatigut paragrafitigullu ajornartorsiut alla puttuppoq.
Nalunaarasuartaateqarneq pillugu peqqussummi immikkoortitsinnginnissamik ileqqussamik immikkoortoqarpoq. Taamaammat nunatsinni innuttaasunut aalajangersimasunut, allanik mattussilluni, oqarasuaatinut internettimullu akimik allamik neqerooruteqartoqaqqusaanngilaq.
Suliami niaqorluutissat arlaqarput. Steen Lyngellu atuartut qarasaasiaarassaata internetterutigineqarnissaat pillugu aaqqiissutissamik tallimanngorpat aalajangiinissaa naatsorsuutigineqarpoq.
