Misissueqqusineq tunuartippaat

februaarip 22-at 2006 14:37

Naalakkersusuusimasut Jens Napaattooq aamma Rasmus Frederiksen, aningaasanik atuivallaarsimasutut akisussaassusiat paasiniarlugu misissuiffigineqarnissaannik Demokraatineersup Jens B Frederiksen-ip piumasaqarnini, ullumikkut tunuartippaa.

- Siunnersuut taamanikkut sanagakku, pissutsit qanoq innersut nalunarsimapput. Aamma taamanikkut naluarput politimesteri misissuinermik aallartitsissanersoq, taamaammat taamatut siunnersuuteqarsimavunga. Kisianni tassa massakkut paasivarput, politimesterip misissuineq aallartissimagaa, misissuinerlu maannakkut ingerlammat naammagisariaqarparput, Jens B Frederiksen oqarpoq.

Inuiaqatigiit aningaasaataannik aningaasarpassuarnik atuisimaneranni, akisussaanerat paasiniarneqassannginnersoq, Jens B Frederiksen aperineqarami ima akivoq: - Pinerluttoqarsimanersoq misissorneqarpoq. Aamma akileraartartut aningaasaataannik eqqunngitsumik atuisoqarsimanersoq misissorneqarpoq. Taanna aamma pinerluttulerinermut inatsisip ataaniippoq, kisianni akisussaanermi inatsisartut inatsisaat naapertorlugu unioqqutitsisimasinnaaneri tassani annikinnerusutut maannakkut isigivara, aamma maannakkorpiaq saqqummernissaa pisariaqarsorinngilara. Politimesterip misissuinera naammassippat qanoq iliussanerluta paasiumaarparput. Pinngitsuutinneqassappata qanoq pisoqassanersoq Jens B Frederiksen aperineqarami ima akivoq:

- Aallaqqaataaniilli pisariaqarsorisimavara suna ilumoortuunersoq paasiniarneqassasoq. Assigiinngitsutigummi isumaqatigiinngittoqarnikuuvoq. Soorunami ataqqineqarumaarpoq politiit eqqartuussiviillu aalajangernissaat.

Demokraatininngaanneersoq Jens B Frederiksen oqarpoq.