- USA-p nunatsinniinnera sillimaniarnermut politikkimut tunngasoq puiorneqassanngilaq. Tassa USA Pituffimmi sakkutooqarfeqarpoq, USA-llu Pituffimmi sakkutooqarfik nammineq sillimaniarnissaminut pisariaqartippaa, Sara Olsvig oqarpoq.

Misissueqqissaartartoq Joint Committeemi ukiuni arfineq-marlunni nipaassimaneq pillugu: Tatigeqatigeeqqilersut

Pituffimmi kiffartuussinissamut isumaqatigiissutit pillugit akerleriittoqareersoq aamma Joint Committeemit ukiuni arfineq-marlunni nipangersimasoqareerluni nunatta USA-mik suleqateqarnera aallartilluarpoq.

2004-mi qungujulasoqarneranik aallartippoq. Nunatta, USA-p Danmarkillu Igalikumi isumaqatigiissut atsiorpaat Joint Committeelu pilersillugu.

Ataatsimiititaliaq USA-p nunattalu ilaatigut niuernikkut, ilinniartitaanikkut, takornariaqarnikkut avatangiisitigullu suleqatigiinnerulernissaanik angusaqarusuppoq.

Suleqatigiinnerli unittoorpoq.

USA-p Pituffimmi kiffartuussinissamut isumaqatigiissut amerikamiut suliffeqarfiuanut 2014-imi tunniupaa. Tamanna pivoq danskit-kalaallillu ukiorpassuarni isumaqatigiissummik tigumminnereernerata kingorna. Isumaqatigiissut taanna nunatta karsianut ukiumut 200 millionit koruuninik isertitsissutaasaraluarpoq.

Joint Committee tatiginnittoqarunnaarnera pissutigalugu ukiuni arfineq-marlunni unittooqqavoq.

Joint Committee pillugu isumaqatigiissut

Aningaasaqarnermut naalakkersuisuusimasup Josef Motzfeldtip, Danmarkip nunanut allanut tunngasunut ministeriata Per Stig Møllerip USA-llu nunanut allanut tunngasunut ministeriata Colin Powellip Igalikumi isumaqatigiissut 2004-mi aggustip ulluisa arfernganni atsiorpaat.

Isumaqatigiissut ilaatigut makkuninnga imaqarpoq: 

- USA qaartartunut ungasissunut igeriuttakkanut illersuusiami radarianik nutarteriniassammat, illersornissaq pillugu isumaqatigiissummut 1951-imeersumut Pituffimmut tunngasumut ilassuteqarneq

- USA nunarpullu ilisimatusarneq, teknologii nukissiuuteqarnerlu, avatangiisit, ilinniartitaaneq, takornariartitsineq, silaannakkut angallanneq niuernerlu pillugit suleqatigiinnerminnik patajaallisaassasut.

Paasissutissanik aallerfik: Danmarkip nunanut allanut tunngasunut ministereqarfia  

Akerleriittoqarunnaatoq

Maannali illuanut saattoqaqqippoq, kiffartuussinissamut isumaqatigiissutit pillugit akerleriinnerup kingorna akerleriinnginneq aaqqinneqarallarpasippoq.

Sara Olsvig ILisimatusarfimmi nunatta USA-llu akorannni atassuteqarnermut tunngasumik maanna ph.d-liortoq taama naliliivoq.

- Pituffimmut kiffartuussinissamullu isumaqatigiissutinut tunngatillugu qanorlu aaqqiisoqarnissaanut apeqquterpassuit suli akissutissaqanngillat. Kisianni 2014-imi tatiginnikkunnaartoqarnikuuvoq, tamanna suleqatigiinnissamut isumaqatigiinniarnermut sunniuteqarsimasinnaavoq, Sara Olsvig oqarpoq, nangillunilu:

- Taamaammat aallartittoqaqqinnera pitsaasumik tamanna ineriartorneruvoq. Malunnaateqarneralu tassani tassaavoq nutaamik ilusilimmik aallartittoqarnera.

USA toqqaannartumik suleqatigineqartoq

Nunatta, USA-p Danmarkillu Joint Committee sapaatip akunnerani matumani pingasunngornermi aallarteqqippaat. Tamanna nunatta suleqatiginerulernissaanut susassaqarfinnillu sisamanik ukkatarinniffiusumik amerikamiut inerisaanermut suliffeqarfianit USAID-imit katillugit 10 millioninik aningaasaliisoqarneratigut ilaatigut pivoq. 

AAMMA ATUARUK Amerikansk diplomat i Nuuk: We are here to stay

Tassani pineqarput niuerneq aningaasaliissuteqartarnerlu, nukissiornermut aatsitassarsiornermullu tunngasut, ilinniartitaanermut kulturimullu tunngasut kiisalu ilisimatusarnermut avatangiisinullu tunngasut. Agguataarnerallu pissutigalugu tamanna allaanerusutut isikkoqartoq, Sara Olsvig oqarpoq.

- Ataatsimiinnermit nalunaarutit tunngavigalugit marlunnik immikkut maluginiagaqarpunga. Suleqatigiinneq Joint Committeemut tunngassuteqartutut suli oqaatigineqarpoq, kisianni aamma illuatungeriit marluk nunatta USA-llu akornanni toqqaannartumut tunngavoq, taanna oqarpoq, nangillunilu:

- Suleqatigiinnerli aamma aalajangersimasunik nassataqarpoq. Naammattunillu pissarsiviunersoq politikerit aalajangissavaat atassuteqarnermili suli ineriartortoqarpoq, Sara Olsvig oqarpoq.

USA-p nammineq sillimaniarnera initusoq

Taassuma pingasunngornermi nalunaarutigineqartut nunatta nunanut allanut tunngasunut politikkimi maanna siuariaateqangaatsiarneranut assersuutissanut ilaasutut isigaa.

- Aamma ineriartorneq kingulleq eqqarsaatigalugu naalagaaffeqatigiinni issittoq pillugu periusissiap nutarternissaanik sukataaruteqarnermut kiisalu nunatsinni nunatta issittumut tunngatillugu immineq periusissiaqarnissaanik imaluunniit nunanut allanut, sillimaniarmut illersornissamulluunniit politikkikkimut tunngatillugu periusissiaqarnissaanik eqqartuisoqartarneranut tunngasutut isigineqarnissaa pingaaruteqarsoraara.

AAMMA ATUARUK Nunarput USA-p millioninik aningaasaliinissaanut isumaqatigiissusiortoq

Amerikamiut nunatsinni sooq suliaqarnissaa pingaarnerpaatinneqarnersoq puiorneqassanngitsoq Sara Olsvigip erseqqissaatigaa.

USA-p nammineq sillimaniarneranut siullertut tunngassuteqarpoq.

- USA-p nunatsinniinnera sillimaniarnermut politikkimut tunngasoq puiorneqassanngilaq. Tassa USA Pituffimmi sakkutooqarfeqarpoq, USA-llu Pituffimmi sakkutooqarfik nammineq sillimaniarnissaminut pisariaqartippaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat