Misiliut katersugaasivinni misissorneqarluni saqqummersikkusunneqarpoq
- Oqaluttuarisaanermi pisut alianartut katersugaasivinni saqqummersinneqarnerisigut paasinarnerulersinneqartarput. Assersuutigalugulu Kalaallit Nunaanniit kiisalu Danmarkimiit suleqatigiittoqarnerisigut misissuineq suliarineqarsinnaavoq, pisumut tunngasumut atugassarititaasut pillugit misissuinerit siulliit ingerlanneqarsinnaapput, saqqummersitsinissamut atatillugu misissueqqissaaqatigiittoqarluni, Maria Rytter oqarpoq, taamatut suleqatigiittoqarneratigut msiliut 1951-imi pisoq tamanut saqqummersinneqarsinnaavoq itinerusumillu misissuiffigineqarluni.
Maria Rytter Inuup kiisalu inuiaqatigiit pissusiinik ilinniagartuujuvoq taannalu Dansk Forsorgsmuseumimi katersugaasiviup nakkutilliisuattut atorfeqarpoq. Misiliut 1951-imi pisoq pillugu Radioaviisimi sammisaqarpugut, tamannalu pillugu annerusumik misissuisoqanngisaannarpoq, taamaammat Maria Rytter maanna siunnersuuteqarpoq, Dansk Forsorgsmuseum kiisalu Nunaatta Katersugaasivia suleqatigiinnerisigut misiliut pillugu misissuisoqarnissaa kiisalu Danmarkimi Kalaallit Nunaannilu Misiliut pillugu saqqummersitsisoqarnissaa. Suleqatigiinnerup kingunerisaanik naalagaaffimmi misissueqqaarnerit siulliit ingerlanneqarsinnaassapput utoqqatsertoqarneranik malitseqartumik.
- Oqaluttuarisaanermi pisut misissoqqissaartariaqarpagut, tamanna qularineqassanngilaq, tassami pisut ilinniarfigisariaqarpagut pereersullu nutaamik isiginnittaasiaqarluta qiviassavagut taava ingerlariaqqinniassaagut, Maria Rytter oqarpoq. Tamannalu Nunatta Katersugaasiviani pisortamit Daniel Thorleifsenimit isumaqatigineqarpoq. Oqaluttuarisaanermi alianartut saqqummersinnerisigut saamateqatigiinneq anguneqarsinnaammat.
- Isumaqarpunga pissutsit assigiinngitsut nunatsinni pisarsimasut tamarmik qulaajarneqarnissaat pisariaqartuusoq. Aamma qularnanngilaq oqaluttuarisaanermi imatut tusarnerpallaanngitsunik tusaraagatta oqaluuseriinnarnagit timitalersoraagatsigit ineriartornitsinnut tamanna iluaqutaasarpoq. Eqqartuinnarnagit aamma iternga tikillugu paasilluarlugit ingerlaqqinniassaagut, Daniel Thorleifsen oqarpoq.
Dansk Forsorgsmuseumimi siulersuisut isumassarsiaq pillugu aalajangiisoqareerpat Nunatta Katersugaasivia saaffigineqassaaq, Maria Rytterip neriuutigaa suleqatigiinneq ukiup tulliani aallartinneqassasoq.
