Misilittagaqarluartut siulersuisunut ilanngupput
Siulittaasunngortoq tassaavoq Greenland Minerals & Energyp aallarniisua aamma pisortaanera Roderick McIllree. Taassuma ajuusaarutigalugu oqaatigaa Lars Emil Johansenip siulittaasutut tunuarnera.
- Lars-Emil Johansenilu suleqatigiilluartarpugut. Ajuusaarutigigaluarlutigu tunuarnera taamaattoq aalajangernera ataqqisariaqarparput, naatsorsuutigaarpulli ilisimasai pikkorissusaalu siunissami atorluarsinnaallutigit, siulersuisuunerni siulittaasunngortoq Roderick McIllree oqarpoq.
McIllree pisortaanermi saniatigut siulersuisuunerni ilaasortaannartut issiatitaagaluarpoq. Taassuma saniatigut siulersuisuunerni ilaasortanngorput nutaat allat marluk, taakkulu siulittaasunngortutut suliffeqarfissuarmi sulisuupput.
Tassalu Michael Hutchinson, taanna London Metal Exchangemi qanga pisortaasimasoq. Taassuma siulersuisuunernut ilanngunnera, Kuannersuarni aatsitassassarsiornermi maannamut suli qanoq annertutigisumik iluanaarutaatiginissaanik nalorninartumi, pingaaruteqarluartussaavoq. Hutchinsonip ilisimasaqarluarfigai nunarsuatsinni aningaasarsiornerit, tusagassiutinut nalunaarummi taanna taama ilisaritsinneqarpoq.
Alla siulersuisuunerni ilaasortanngortoq tassaavoq Greenland Minerals and Energymi pisortat ilaat, Anthony Ho.
