Misilittagakitsut ajugaanissamut piukkussanut unammissapput
Taamaattumik Presidents Cupimi inissitsiternerit appasinnerit unammissutigineqarfigisaanni angusarissaarniarnissaq nuna tamakkerlugu sungiusaasumit Preben Clausenimit siunniunneqarpoq.
U20-ni arnat nunanut allanut unammisartut siornatigut Europami unammisartunut unammisimanngitsut Norge, Frankrig, Tyskland, Tunesia aamma Serbia puljeqatigisussanngorpaat.
- Pulje ajornakusoortorujussuuvoq, Norge, Tyskland Frankrigiluunniit VM-imi ajugasinnaammata. Unamminerni aallarniutaasuni misilittagakinneq pissutigalugu ilungersunartorsiussaagut, taamaattumillu Presidents Cup, inissitsiternerit appasinnerit unammissutigineqarfissaat piviusorsiortumik qilanaariinnartariaqarparput, Assammik arsartartut kattuffianni GHF-imi tusagassiisartoq Carl Johan Colberg oqarpoq.
Tassani U20-ni nunanut allanut unammisartunit unammineqartussat tassaapput Australia, Thailand, Mexico aamma Hong Kong.
- Nunat taakku pointinik pissarsivigisinnaassavavut, Carl Johan Colberg naliliivoq.
EM-imi Danmark nr. 10-nnguinnarpoq, taamaammallu VM-imut peqataassanani, A-landsholdini arsaqataasartunik pingasunik arsartortaqaraluarlutik.
- Unammisassatta qanoq kakkatsiginerinut tamanna takussutissaavoq, Carl Johan Colberg oqarpoq.