Misilitsittarneq atuartitsinermik taarserusuppaat
Kommunit kattuffissuanni isumaqartoqarpoq, inaarutaasumik misilitsinnerit pisariaqarnatillu aningaasartuutaavallaartut.
Taamaattumik Danmarkimi ilinniartitsisut kattuffianni siulittaasup Anders Bondo Christensenip misilitsittarneq atuartitsinerunermik taarserusuppaa.
- Inaarutaasumik misilitsittarnerup misissoqqissaarnissaa isumassarsiatsialaasinnaavoq, tassami meeqqat atuarfiat sutigut tamatigut allanngoriartuaarsimavoq, tassa immersorneqarnermigut, aaqqissuussaanermigut atuartitseriaatsitigut allarpassuartigullu. Taamaattumik inaarutaasumik misilitsittarnerup misissuataarnissaanut pissutissaqarluarpugut.
Tassami atuartut 9. klassimut pigaangata, atuartut atuartinneqarneranni inaarutaasumik misilitsinnissaq piffissamik angisuumik atuiffigineqartarpoq, isumaqarpungalu piffissaq pitsaanerusumut atorneqarsinnaagaluartoq, Anders Bondo Christensen oqarpoq.
Ullumikkut periaatsimi atorneqartumi, atuartut ilinniarfinnut assigiinngitsunut qinnuteqaateqareersut atuartut inaarutaasumik misilitsittarput, taamaattumik inaarutaasumik misilitsittarneq immikkut pingaarutaarussimasoq, Kommunit Kattuffissuanni isumaqartoqarpoq.
