Misiligutaasumik iperagaanissaa itigartitsissutigineqarpoq

Abel Klemmensenip ikinngutiminik arfineq-marlunnik 1990-imi ukiutoqqami unnuakkut toqoraasimasutut pineqaatissinneqartup, misiligutaasumik iperagaanissani naatsorsuutigissanngikkallarpaa. Kalaallit Nunaanni Eqqartuussisuuneqarfik taama aalajangiivoq.
Assi © : KNR
Allattoq Louise M. Kleemann
juunip 14-at 2011 16:33

Taamaalilluni misiligutaasumik iperagaasinneqarnissaanik Narsap Eqqartuussiviani februarimi eqqartuussut Eqqartuussisuuneqarfimmit allanngortinneqarpoq.

Abel Klemmensen tarnip pissusaanik ilisimasalimmit Herstedvesterimi marsip qaammataani misissorneqarpoq. Tassani naliliinermi oqaatigineqarpoq Abel Klemmensen aqussinnaanngisaminik suli inuttut misikkarliuuteqartoq.

- Tamanna ima isumaqarpoq, pisinnaasaqarnerusutut imminut nalilersinnaaginnarani aamma pissutsimigut aqussinnaanngisaminik nalorninartorsiuteqartartoq, Kalaallit Nunaanni Eqqartuussisuunerup tusagassiuutinut nalunaarutaani ilaatigut taama allaqqavoq.

Abel Klemmensenip misiligutaasumik iperagaasinneqaruni isumannaatsumik ingerlatsisinnaanera suli anguneqarsimanngitsoq, eqqartuussutigineqarsimasorlu maannakkut atorunnaarsinneqartariaqartoq, tarnip pissusaanik ilisimasallip ataatsimoortumik naliliinerani ilaatigut aamma oqaatigineqarpoq.

Abel Klemmensen  2009-mi novembarimi nammineq inigisaqalerpoq, sapaatip akunnerata naanerani unnuifigisinnaasaminik. Maannakkut misiligutaasumik iperagaasinneqanngikkaluartoq, pissutsit taakku atuutiinnassasut eqqartuussisuuneqarfimmit oqaatigineqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk