Misigisassarsiorlutik angalasut ikiuilersut
Silap pissusaanik misissuisut, qallunaanit misigisassarsiortunit sisamanit ulluni makkunani ikiorserneqassapput. Misigisassarsiortut taakku sisamat Tunup Avannaaniittumut sermimut Walterhausen Gletsjerimut qajarissamik maanna ingerlaaleruttorput.
Angutit taakku misigisassarsiorlutik angalapput. Angalanerminnulli peqatigitillugu sermip pineqartup assilisaqattaarnissaanik GPS-ilu atorlugu uuttortarnissaanik GEUS-imik aamma qallunaamik silap pissusaanik misissuisumik Sebastian H. Mernildimik, USA-mi Los Alamos National Laboratorymeersumik isumaqatigiissuteqarsimapput.
Tunup Kujataani serminik uuttortaajartortoqartareerpoq, Tunulli Avannaani serminik suli uuttortaasoqarsimanani. Aamma misissuisut Tunup Avannaani sermit aakkiartornerinut tunngasunik ilisimasaat killeqaqaat, Sebastian H. Mernild ilisimatitsivoq.
Angutit misigisassarsiortut taakkua sisamat, aqqutaani misigisatik nittartakkakkut allaaserisassavaat. Aamma nittartakkami atuarneqarsinnaasutut, maannamut annerusumik akornutissarsiffiunngitsumik angalapput. Aqqutiminni unnuiffissaasa siulliit ilaanni illuaqqami, nanoq pulaarsimavoq. Taquaalli nannup qujanartumik naninngitsoorsimavai.
Angutit taakku sisamat maanna qooqqup Blomsterdalenip eqqaaniipput, tamaangaanniillu Waltherhausen Gletsjeren anguniartussaavaat. Taakku angalanerat nittartakkami uani malinnaaffigineqarsinnaavoq: greenland2011.dk
