MIPI sipaarniarfigineqarpoq

MIPI 1,3 millioni koruunit sinnilaarlugit siorna aningaasaliiffigineqarpoq, ukioq mannali sisamararterummik sipaarniarfigineqarluni, MIPI-p siulittaasua tamanna pillugu ima oqarpoq:

- MIPI-p sipaarniarfigineqarnissaa siulersuisuni ilimagereerparput, sipaarniutigineqartulli MIPI-p angissusaanut naleqqiutissagaanni annertuallaarput, tupigusuutigaarpummi sipaarniutigineqarniartut taama annertutigimmata, Meeqqat Inuusuttullu Pillugit Ilisimasaqarfimmi siulersuisuni siuittaasoq Naaja Nathanielsen oqarpoq, nangipporlu:

- Sisamararterummik sipaarniarfigineqarnerput angissusitsinnut naleqqiullugit annertuallaarujussuarput. Meeqqanut inuusuttunullu sullissiniarnitsinnut tamanna kalluaassaaq. Suliarput inuiaqatigiinnut pingaaruteqarpoq, sulisullu aningaasaliisussarsiortalissappata nukiit asuli atortalissavagut, Naaja Hjejlholt Nathanielsen oqarpoq.

Sipaarniutit piviusunngorpata MIPI-p sinerissamut angalasarneri ikilisarneqartariaqassasut taassuma aamma oqaatigaa, suliniutigineqartullu pillugit qaammarsaanikinnerusoqartariaqalissanerarlugu.