MIPI: Politikkikkut aqunneqarneq annikinnerusariaqarpoq
Aningaasaliiffigineqarnerunissaa aamma ilisimasaqarfiup politikkikkut arlaannaannulluunniit atasuunngitsutut ingerlanneqarnerata nakussassaavigineqartariaqarsorineqarpoq.
MIPI-p 2008-mut ukiumoortumik nalunaarutaani erserpoq, siulersuisut takusinnaasaat tassaasoq Kalaallit Nunaanni meeqqat inuusuttullu pillugit ilisimasaqarnermik siaruarterinermillu inuiaqatigiinni suli pisariaqartitsisoqaqisoq.
Siulersuisut ajoraluartumik aamma ukioq MIPI-p siunissami ingerlatsivittut ineriartornissaa pillugu naammassineqanngitsumik politikkikkut oqalliserineqarsimaneranik sunnerneqarsimasoq kingumut qiviarsinnaavaat. Taamaattumik MIPI-p siunissaa 2009-mi inatsisartut upernaakkut ataatsimiinneranni pingajussaanik oqallisigineqartussaavoq.
Siulersuisut MIPI-mut tunngasumik inatsisit allannguuteqaqquaat, maanna inatsit atuuttuusoq MIPI-mi ingerlatsinermut naleqqukkunnaarmat. Kissaatigaat MIPI-p siunertarisaa 2009-milu sulinissaa, allaffissornermut politikkikkullu pissutsinut tunngasunut isummernerit oqallinnerillu pinnagit, pimoorullugu sammineqassasut.
Aqunneqarnerata erseqqissumik ilusiligaanerata amerlanerusunillu sulisoqarnerata MIPI meeqqanut inuusuttunullu tunngasutigut ”ilisimasaqarfittut” siunertaa qularnaatsumik nakussassassavaa siunissamilu iliuutsit ilisimasanik tunngaveqarnissaat qulakkeerlugu, tamatumuunalu uagut inuiaqatigiinni meeqqat inuusuttullu atugarisaat pillugit pitsaanerpaanik angusaqartassalluta, siulersuisut nalunaarput. Neriuutigaallu MIPI-mi sulisut sulisunik marlunnik ilaneqarsinnaajumaartut.
