MIPI-p siulittaasua tunuarpoq
Tarnip pissusiinik ilisimasalik, 34-nik ukiulik, Naaja Nathanielsen, Inuit Ataqatigiit tunuliaqutaralugit Inatsisartunut sapaatip akunnera kingulleq qinigaavoq, MIPI-millu tusagassiutinut nalunaarut naapertorlugu, siulersuisuni siulittaasuunerminit tunuarneranut tamanna pissutaavoq. Kisianni aamma eqqarsaatigineqarpoq politikerinngorlaaq taanna peqqinnissaq pillugu naalakkersuisunngussasoq.
Naaja Nathanielsen MIPI-mi siulersuisuni 2003-miilli ilaasortaasimavoq, 2007-imilu siulittaasunngorluni.
- MIPI-p ineriartortitaasimaneranut aallaqqaataaniilli peqataasimalluni pissanganarsimaqaaq, angusarisallu amerlasuunut nuannaarutaasimasut tulluusimaarutigaakka, Naaja Nathanielsen oqarpoq.
MIPI tusagassiutinut nalunaarummini allappoq, Naaja Nathanielsen MIPI-p ukiut ingerlaneranni ingerlatarisarsimasaanut meeqqat inusuttullu pillugit ilisimasaqarluarnermigut iluaqutaalluarsimasoq.
- Ilisimasat pinngitsoorneqarsinnaanngitsut siulersuisut oqallittarnerpassuinut aalajangiisarnerinullu annertuumik sunniuteqarsimasut, angusarissaartitsisuusarsimasullu, Nunatsinnilu inuit atugarisaat pillugit pitsaasumik kinguneqarluartumillu oqallittarnernut tunngaviisarsimapput, MIPI-mit allapput. Naaja Nathanielsenip taartissaa Nunatta Atuagaateqarfianit siunnersuutigineqartussaavoq, Naalakkersuisunngorumaartullu siunnersuut akuerisassaralugu.
