MIO-p nersornaasiuttagaa siullerpaamik ullumikkut tunniunneqassaaq
MIO-p nersornaasiuttagaa siullerpaamik ullumikkut tunniunneqassaaq. Nersornaat 20.000 kr-nik aningaasaqartaqassaaq, kinalu imaluunniit kikkut nersornaaserneqarnersut nersornaatip tunniunneqarnerani paasineqassaaq.
Nersornaasiinermi aningaasat tunniuneqartut aningaasaateqarfimmit Nunafonden-imit tapiissutigineqarput.
MIO tusagassiuutinut nalunaarummi, kikkut imaluunniit kina peqatigiiffilluunnit MIOp nersornaasiuttagaanik siullerpaamik tunineqassanersut nalunaarutigineqanngilaq.
MIOp nersornaasiuttagassaa meeqqat pisinnaatitaaffiinik atuutsitsinissamik immikkut ittumik pitsaasumik nersortarialimmik suliaqarsimasunut tunniunneqartassaaq
- Inuit ajornartorsiutinut imaaliallaannaq aaqqinneqarsinnaanngitsunik periarfissaaleqigaluarlutik nutaamik isummersorlutik aaqqiissutaasinnaasunik ujartuillutik piviusunngortitsisut nersornaammik tunineqartartussanut ilaapput, MIO tusagassiuutinut nalunaaruteqarluni taama allappoq.
Nersornaammik tunniussisarneq ukiut tamaasa illoqarfinni assigiinngitsuni tunniunneqartarnissaa MIO-mit neriuutigineqarpoq.
Nersornaammik tunniussineq Nuummi Kulturikkut illorsuarmi Katuami ualimut nalunaaqutaq pingasunut pissaaq.