Meeqqat illersuisuata angalanermini illoqarfiit nunaqarfiillu assigiinngitsut ulluni 29-mi tikeraarpai. Angalanermi nalunaarusiaq meeqqat, inersimasut sulianillu isumaginnittut kinaassutsiminnik isertuussisut 175-it oqaloqatiginerat aallaavigalugu suliarineqarpoq.

MIO-p angalanermi nalunaarusiaa: Qeqertalimmi meeqqat innimiilliorfigineqarsimasut illersorniarnerat ajornartorsiutaangaatsiarpoq

Kommune Qeqertalimmi meeqqat inuusuttullu amerlasuut naammattumik isumassorneqaratillu illersorneqanngillat. Kommune erngertumik iliuuseqartariaqartut Meeqqat Illersuisuata angalanermini nalunaarusiami inassuteqarpoq.

Kinguaassiutitigut immimiilliornerit, hashimik atornerluingaatsiarneq aamma sumiginnaanerit atornerluinerillu nalunaarutigineqartut pillugit amigartumik suliarinnittarnerit.

Meeqqat Illersuisuata Kommune Qeqertalimmut angalareerluni nalunaarusiaani immikkoortut qitiusut tamakkuupput.

Meeqqanut kinguaassiutitigut innimiilliornerit inuiaqatigiit akornanni paquminartorujussuusut, meeqqat illersuisuata, Aviâja Egede Lyngep oqaatigaa. Taassuma oqarnera naapertorlugu tamanna meeqqanut ikiuiniarnermut ajornakusoortitsivoq, nalunaarutigineqarnermi ajormata.

Meeqqat illersuisuata angalanermini illoqarfiit nunaqarfiillu assigiinngitsut ulluni 29-mi tikeraarpai. Angalanermi nalunaarusiaq meeqqat, inersimasut sulianillu isumaginnittut kinaassutsiminnik isertuussisut 175-it oqaloqatiginerat aallaavigalugu suliarineqarpoq.

Inunnik isumaginnittoqarfimmit susassaqarfinniillu allanik sulianik isumaginnittut kinguaassiutitigut innimiilliornerit ilaat oqartussanut nalunaarutigineqartannginnerat ernumassutigalugit aamma oqaatigaat.

Taamaammat kommunip nalunaarutigineqanngitsoqarnersoq erngertumik misissuiffigissagaa MIO inassutigaa.

- Tamanit ilisimaneqarpoq, iliuuseqartoqanngilarli. Taakku (kinguaassiutitigut innimiilliornerit aaqq.) nalinginnaasutut inissinneqarsimasutupajaaq ipput, MIO-p oqaloqatigisaata ilaat oqaluttuarpoq.

AAMMA ATUARUK MIO: Inunni kikkuugaluartuni kinguaassiutitigut naapertuilluanngitsuliortoqartarpoq

Tamatuma saniatigut meeqqat atuarfianni atuartunut innuttaasunullu meeqqat pisinnaatitaaffii pillugit ullunik susassaqartitsiffiusoqarpoq.

Kommunip meeqqanut kinguaassiutitigut innimiilliornerit nalunaarutigineqartut qassit tigusimanerai nalunaarusiami allassimanngilaq. Nalunaarutigineqanngissimasinnaasulluunniit qassiusinnaanerannut kisitsiseqarani.

Pissutsit isumakulunnartut

Kommunimi meerarpassuit kinguaassiutitigut innimiilliorfigineqaranit atornerluiffiunatik inuunerissaartut nalunaarusiami erseqqissaatigineqarpoq. Taamaakkaluartorli meeqqat ilaat kinguaassiutitigut atornerlunneqarsimasut amerlangaarmata kommunip iliuuseqarnissaa MIO-p inassutigaa.

Meeqqat Illersuisuata kommunimi meeqqat inuusuttullu ilaasa timikkut tarnikkullu peqqissusaat aamma isumakuluutigaa.

MIO'p angalanermi nalunaarusiaa pillugu

 

MIO 2019-imi oktobarip ulluisa 19-iannit novembarip ulluisa 6-iannut angalavoq.

 

MIO illoqarfiit nunaqarfiillu uku tikeraarpai:

  • Niaqornaarsuk 
  • Ikerasaarsuk
  • Kangaatsiaq
  • Aasiaat
  • Akunnaaq
  • Qasigiannguit
  • Qeqertarsuaq

 

Meeqqat illersuisuata meeqqat, inersimasut suliamillu isumaginnittut 175-it oqaloqatigai. Taakkunannga 42-t meeraapput.

 

Meeqqat, inuusuttut utoqqaallu 200-it missaanniittut Aasianni Qeqertarsuarmilu pisinnaatitaaffiit pillugit ulloqartitsinermi peqataapput.

 

Meeqqat atuarfianni atuartut 359-it MIO-p pisinnaatitaaffiit pillugit sammisaqartitsinerani peqataapput.

 

Tusarfik: Meeqqat Illersuisuata Kommune Qeqertalimmut 2019-imi angalanermit nalunaarusiaa.

Meeqqat qulinik ukiulinninngaanniit toqorusunnermik kissaateqartartoqartartoq ilaatigut oqaatigineqarpoq. Meeqqat ilaasa tarnikkut nakuuserfigineqartarnerisa saniatigut piffissat ilaanni naammattunik nerisaqartannginnerat aamma ajornartorsiutaavoq.

Naak meeqqat peqqissusaat pillugu ajornartorsiuteqartoqannguatsiaraluartoq Aasianni sulisut amigartut kommunimi sulisut nalunaarutigaa:

- Illoqarfimmi peqqissaasut amigaataapput. Siusinaartumik iliuuseqartoqarnissaa pisariaqartinneqarpoq. Aasianni meeqqat ikeqimmata peqqissaasoqarnissaa akilersinnaanngissorineqarpoq.

- Meeqqat akornanni annertuumik aniornernik amerluuteqartoqarpoq. Ilaqutariit ilaasa akorannni eqqiluisaarnissaq amigaataangaatsiarpoq, nalunaarusiami allassimavoq.

MIO-p Kommune Qeqertalimmi hashimik atornerluineq aamma misissuiffigaa. Hashimik atornerluineq illoqarfinni nunaqarfiillu ilaanni inersimasut akornanni annertuutut nassuiaatigineqarpoq.

Meeqqat inuussuttullu 9. klassimiit hashimik pujortartarnermik pinngitsuuisinnaajunnaarsimasut aamma nalunaarusiorneqarput.

Nakkutilliineq pitsanngorsarneqassasoq

Kommunip meeqqat inuusuttullu kinguaassiutitigut innimiilliorfigineqarsimasut imaluunniit allatigut ikiorneqarnissamik pisariaqartitsisut amerlanerusut ikiussagunigit oqartussat ikiuinissamut isumalluuteqarnerussapput.

Tamanna MIO-p nalunaarusiaani inerniliinerit pingaarnerit ilagaat.

AAMMA ATUARUK MIO aamma Meeqqat Ikiortigit kommunip suliamik isumaginninnera sakkortuumik isornartorsioraat

Sulisut meeqqanik ajornartorsiuteqartumik paasisaqarnerulernissamut meeqqanullu orniguttunut ikiuinissamut sakkussaqarnerulissapput.

Oqartussallu soorlu atuarfiit, politiit isumaginnittoqarfiullu akornanni suleqatigiinnerisa pitsanngorsarneqarnissaat aamma pisariaqarpoq. Tamanna sulianik isumaginnittarnermut sivisuumut, meeqqallu toqqissisimanerannut innarliisinnaasumut sivikillisaataassaaq.

MIO-mit Kommune Qeqertalimmiillu oqaaseqartoqarnissaa KNR-ip sulissutigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat