ALLAATIGISAQ MIO: Nunarput meeraaffigalugu tassaavoq inuiaqatigiit paasissutissiineq ajortut

Nunatta Folketingimut ilaasortaatitassaannut marluusunut KNR-ip peqatigiiffiit kattuffiillu assigiinngitsut qinnuigisimavai taakkununnga allagaqaqqullugit. Tassani Folketingimi suliassatut pingaartinnerpaasaat allaasereqquneqarlutik.

Folketingimut qineqqusaarneq aallartilluareerpoq, qineqqusaartullu pingaartitatik tusagassiutitigut saqqummiussuuttalereerpaat, inuinnaat attaveqaqatigiittarfii ilaatigut aqqutigalugit. Partiit pingaartitaannik, taakkulu nunatsinnut qanoq iluaqutaajumaarnerannit partiit oqariartuutaannik inersimasut ajornanngitsumik pissarsiniarsinnaajuarput.

Taamaasilluni Kalaallit Nunaanni demokratiimi naleqartitat tunngaviusut malinneqarput, assersuutigalugu killiligaanngitsumik isummersorsinnaatitaaneq, oqalliseqataanissamullu pisinnaatitaaneq. Nunattali pisussutaa pingaarnerpaaq puiorneqarsimasorinarpoq. Tassami, naak meeqqat inuusuttullu qinnequsaarnermi sammineqarnerat? Tassa suliniuteqarfissatut eqqartorneqaannaratik aammali demokratiimi inuttaaqataasutut inuiaqatigiinni oqalliseqataatinneqartariaqarput.

Naalagaaffiit Peqatigiit meeqqat pisinnaatitaaffiinut isumaqatigiissutaani, § 12, 13, 14 –mi erseqqissarneqarput meeqqat inuusuttullu akuutinneqarnissamut pisinnaatitaaffii. Taamaasilluta qulakkeertussaavarput meeqqat inuusuttullu, pissutsinut taakkununnga attuumassuteqarnut tamanut, isummaminnik saqqummiussisinnaanissaat. Taakkuttaaq inersimasutulli oqaaseqarsinnaatitaanermut pisinnaatitaaffeqarput. MIO-mi attavigiuarpavut inuusuttut arlallit, Meeqqat Illersuisuannut siunnersortaasut. Taakku oqaluttuarput nunatsinni pisunik assigiinngitsunik annikitsuinnarmik paasissutissinneqartarlutik misigisimagitsik. Tamanna ateqartippaat: “inuiaqatigiit paasissutissiisanngitsut”. Aamma oqaluttuarput ”suliat nutaat pillugit politikkerit pitsaanerusumik meeqqanut nassuiaassuteqarsinnaasariaqartut”. Oqariartuutit taakku uagut inersimasutut pingaartillugit tusaaniartariaqarpavut. Inuusuttut inuiaqatigiinni demokratiskiusuni peqataarusupput, taamaliornissaminnullu pisinnaatitaaffeqarlutik, tamannarpiaq peqqutigalugu taakku meeraanerminniilli demokratiimut akuujuaannarnissaat ammaffigalugulu kajumissaartuartariaqarpavut.

Meeqqat inuusuttullu demokratiimi periutsinut paasisimasaqarnerunissaannut sungiusarnissaannullu paasissutissinneqartarnissaat qulakkeertariaqarparput. Suliarlu tamanna aatsaat aallartinneqarsinnaavoq  periarfissani assigiinngitsuni meeqqat akuutinneqartarnerisigut. Meeqqat Illersuisuata inuusuttut attavigisaasa tikkuarpaat suliniutit meeqqanut tulluarnerusut aallartinneqarsinnaanerat: aperineqarsinnaapput qanoq innerinik aamma assersuutigalugu politikkerit meeqqat siunnersuisoqatigiivinik pilersitsisinnaapput, aalajangiiniartarnerminni ikiortigisarsinnaasaminnik. Tamakku saniasigut qineqqusaartitsilluni oqallitsitisoqarsinnaavoq, meeqqat inuusuttullu politikkerinut qineqqusaartunut apeqquteqaateqarfigisarsinnaasaannik.

Demokratiimut peqataatitsisarnermik suliaqarnerup aallarniutigisarpaa inersimasut maligassiuinerat

Inuusuttut ilaata kissaatigaa nunatsinni inuiaqatigiit tassaassasut inuiaqatigiit qinngasaarisarfiunngitsut. Matumani inersimasut maligassiusuusariaqarput. Inersimasut iliuusaat tamaasa meeqqat ilinniarfigisarpaat. Qineqqusaarnerit kingulliit qiviaraanni tusaaneqarsinnaavoq politikkerit partiillu illersortaat sakkortuumik nipeqarlutik akerlilersuuttartut. Pingaartumik Facebook immikkut eqqarsaatigaara, inuiannaat attaveqaqatigiittarfiat aamma meeqqanit inuusuttunillu atorneqartoq. Taamaattumik politikkerit inersimasullu allat kajumissaarusuppakka torersumik iluaqutaasussamillu siunertaqarluni attaveqaqatigiittarnermik takutitseqqusaqqullugit.

Qinersilluarisi!

Inuulluaqqusillunga

Aviâja Egede Lynge

Meeqqat Illersuisuat