MIO: Kommunit meeqqanik ikiorsiiniarnerminnik ajornartorsioqaat
Niviarsiaraq maanna qulingiluanik ukiulik, Ilulissani eqqakkanik ikuallaavimmi inuup niuanik siorna nassaarpoq. Taannali pisariaqartitaminik Avannaata Kommunianit ikiorserneqanngitsoq, arnaa, Dina Dora Marcussen, KNR-mut siusinnerusukkut oqarpoq.
Ilulissani toqutsillunilu agguisoqarnera
28-nik ukiulik, Tittus Hansen, inummik toqutsisutut inuullu toqunikup timaanik assuarnartumik ikkatilliisimasutut eqqartuunneqarpoq.
Taanna killiligaanngitsumik paarisassanngortinneqarpoq.
Toqutaasumut qanigisaasunut katillugit 300.000 koruuninik taarsissaaq.
Tassalu pania maanna kingunerlutitsilluni kamarujussuartalerpoq.
- Paniga nilliarujuttalerpoq naterlu tukkartalerlugu, Tarnip pissusaanik immikkut ilinniarsimasumit ikiorneqarnissaa kissaatigaara, Dina Dora Marcussen oqarpoq.
Meeqqat Illersuisuat sulianut ataasiakkaanut oqaaseqarsinnaanngilaq.
Meeqqalli pisariaqartitaminnik ikiorserneqanngikkaagamik ajortumik pisoqaqqissinnaanissaanut annilaagaannalersinnaasartut taanna oqarpoq.
- Meeqqat pissusaat allanngorsinnaasarpoq. Soorlu assersuutigalugu sakkortuumik pissuseqalernikkut. Aamma timertik imaluunniit oqaatsit sakkortuut atorsinnaallugit. Kisianni aamma killormuuanik imminnut mattussinnaasarput, Aviâja Egede Lynge KNR-mut oqarpoq.
AAMMA ATUARUK Qulingiluanik ukiulik inuup timaata ilaanik nassaareernermini pisariaqartitaminik ikiorneqanngitsoq
Dina Dora Marcussenip oqarnera naapertorlugu Avannaata Kommunia borgmesterilu ikiuunnisaminnik neqeroorsimanngillat. Borgmesterip, attaviitsup, Palle Jerimiassenip, inunnut ataasiakkaanut tunngasut KNR-mut oqaaseqarfigiumanngilai, kisianni:
- Innersuuttarpagut immikkoortortaqarfimmi pineqartumi oqaloqatissaannut, Palle Jerimiassen oqarpoq.
MIO: Kommunit ajornartorsioqaat
Meeqqat Illersuisuata oqarnera naapertorlugu, meeqqat illersorneqarnissaannut inatsimmi, 2017-meersumi, meeqqat ikiorserneqarnissaat kommunit pisussaaffigaat. Kommunilli pisussaaffimmik tamatuminnga naammassinnikkuminaatsitsisut taanna oqarpoq.
- Kommunit una inatsit malinniarnera ajornartorsiutigisorujussuuaat.
Taamaattumik Meeqqat Pisinnaatitaaffiinut Sullissiviup ajornartorsiut tamanna tamat takusinnaasaanni saqqummiuteqattaarsimagaluarpaat.
- Tarnikkut ikiorsiisarneq meeqqanut nunatsinni pisariaqartitsisunut ajorluinnarmat. Taamaammat una ajornartorsiut ajoraluartumik nutaajunngilaq taamaammat aamma ajoraluartumik tupaallaatiginngilara.
- Piffissanngorpoq tarnikkut meeqqanik ikiorsiisarneq politikkikkut pingaartinneqalernissaa, Aviâja Egede Lynge oqarpoq.
Meeqqat sakkortuumik misigisaqarnikuunertik inuunermi sinnerani kingunerlutsittassanngippassuk tarnikkut ikiorneqarnissaat pingaaruteqaqisoq taanna aamma oqarpoq.