Minutsit tallimat ingerlanerinnaanni ujammit kuultit marluk

Bulgariap illoqarfiisa pingaarnersaanni, Sofiami, Taekwon-Do-mik Europami sapaatip-akunnerani uani pissartanngorniuttoqarnerani kalaallinit peqataasunit tusagassaq nuannersoq taanna ippassaq takkuppoq.
Allattoq Carla Davidsen
maajip 18-at 2012 07:59

Taekwon-Do-llammaap Lauritz Heilmannip, Walesimeersoq Dean Matthews, periutsinik takutitsinermi, unammigamiuk  Europami tallimassaa pissartanngorpoq. Dean Matthews Lauritz Heilmannip siusinnerusukkut ajugaaffigereernikuuvaa.

Lauritz Heilmannip ajugaaniutivinnginnerani, minutsialunnguit sioqqullugit, Christian Isaksen griikerimut aamma ajugaavoq.

Minutsit tallimat ingerlanerinnaanni ujammit kuultit marluk - oqarsinnaavugullu tamanna allartilluarneroqisoq - kinguninngualu aamma ataatsimik sølvinnattoqarpoq bronzennattoqarlunilu, Angutinnguaq Tittussenip aamma Johan Peter Halsøep taakku pissarsiarigamikkik.

Kalaallini peqataasuni pingasut, tassa Louis Nielsen, Lautritz Heilmann aamma Apalannguaq Mathiessen, Taekwon-Do-p Europami kattuffiata ataatsimeersuarnerani peqataanissaminnut ippassaq aamma periarfissaqarput, tassanilu aalajangerneqarpoq Europami pissartanngorniunneq tulleq Bled-imi, Sloveaniami Kroatiamilu 2014-imi pissasoq.

Nunat 32-t ukioq-manna peqataapput, katillugit 820-t Sofiami Europami pissartanngorniuteqataallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq