Ministeriunerup Nunarput eqqartunngilaa
Folketingimi ataatsimiinneq ullumi aallartinneqarpoq.
Ataatsimiinnerup aallartinnerani Folketingip ataatsimiittarfiani Christiansborg-imi Naalakkersuisut siulittaasuat Kuupik Kleist, Ineqarnermut attaveqarnermut angallannermullu
Naalakkersuisoq Jens B. Frederiksen aamma Inatsisartut siulittaasuat Josef Motzfeldt najuupput.
- Naalagaaffeqatigiinnermi polikki nutaaq piffissami nutaammi atuuppoq. Kalaallit Nunaanni Savalimmiunilu akisussaaffinnik nammineq nunaminni aalajangiffigisassaminnik pingaarnersiugassamminnillu tigusinikuupput.
Lars Løkke Rasmussen oqalugiarnermini Kalaallit Nunaat pillugu oqaasia taannatuaavoq.
Akerlianik Savalimmiut pillugu oqaaseqarami oqaaqqissaaruteqarpoq. Lars Løkke Rasmussen aggutsip qaammataani pisortatigoortumik Savalimmiunut tikeraarpoq.
Savalimmiuni nunap naalakkersuinikkut ingerlanneqarneranut siunnersuut, Savalimmiuni inatsisartuni maannakkut suliarineqartoq Lars Løkke Rasmussenimut saqqumminneqarpoq. Siunnersuullu taanna pillugu Lars Løkke Rasmussen oqaaqqissaruteqarpoq.
- Savalimmiormiut Danmarkimut attaveqarnermikkut nutaamik qanorluunniit ikkaluartumik aaqqiissappata, tamassuma kinguneriumaagassai sapinngisamik ersarissarissut Savalimmiormiut aalajangertariaqarpaat, soorluttaaq Danmarkimut attaveqarnermi nutaami Danmarkip Davalimmiullu ataatsimoorlutik malitassaat ataqqineqartariaqartut.
Ministeriuneq Lars Løkke Rasmussen oqalugiarnermini Savalimmiut pillugu oqaaseqarnermini aningaaserivik Savalimmiormiunit pigineqartoq Eik Banki akiliisinnaajunnaarluni ajalusoortoq eqqaavaa.
Danskit naalagaaffiata ukioq 2008-imi pilersitaa bankpakke, aningaaseriviit ajutoornissaanut sillimmasiivik iluaqutigalugu, aningaaserivimmi Eik Banki-imi uninngasuuteqartut eqqorneqannginnerat Lars Løkke Rasmussen oqalugiarami erseqqissarpaa.
Ammaanersiornermi oqalugiaat uani atuaruk:
