Ministeriunerup kalaallit ilinniartut naapikkusuppai

Atlantikup avannaani qinikkat Folketingimi suleqatigiiffiata ilinniartunut nunatsinneersunut Savalimmiuneersunut Danmarkimilu qinikkanut naapeqatigiissitsinissaa Folketingimi qinikkanit assut soqutigineqartutut nalilerneqarpoq, ministeriuneq Anders Fogh Rasmussen naapeqatigiinnissamut ilaajumalluni nalunaarsimammat.

Naapitsitsinissamik aaqqissuisut Atlantikup avannaani qinikat suleqatigiiffiat ilisimatitsivoq Anders Fogh Rasmussen naatsumik oqalugiarumasimasoq. Oqalugiareerpat oqillittoqassanngilaq, ilinniartulli ministeriunermik ilassinninnissamut periarfissaqartut, aaqqissuisunit ilisimatitsissutigineqarpoq.

Ilinniartut nunatsinneersut Savalimmiuneersullu naapeqatigiinnissaannut danskit qinikkat allat soorlu avatangiisinut ministeri Conni Hedegaard aamma ilinniartitaanermut ministeri Bertel Haarder, Socialdemokratit siulittaasuat Helle Thorning Schmidt kiisalu Dansk Folkepartiimeersoq Søren Espersen aamma ilaaniarput.

Nunatta Savalimmiut Danmarkillu qanoq suleqatigiissinneqarsinnaanerat pillugu qinikkat qaaqqusaasut tamarmik isummersortinneqassapput. Kalaallit Danmarkimi ilinniartut 392-iupput Savalimmiormiullu 800-it 1000-llu akornaanniipput.