Danskit maanna naalakkersuisui Folketingimut qinersereernermi naalakkersuisuuginnarnissaat siunertarilluinnarlugu qinigassanngorteqqissalluni, Mette Frederiksenip aamma erseqqissaatigaa.Assi: Mads Claus Rasmussen/Ritzau Scanpix

Ministeriuneq qinersinissamik suaaruteqaqqusinermut oqaaseqarusunngilaq

De Radikalekkut qinersisitsinissamik nalunaaruteqaqqusinerat tusaatissatut tigugini, Mette Frederiksenip oqaatigaa. Qinersisitsinissamilli nalunaaruteqarnissamut ukiumik ataatsip missaanik suli periarfissaqarluni ilanngullugu erseqqissaatigaa.

Ministeriuneq Folketingi oktobarip sisamaani ammaanersiortinnagu qinersisitsinissamik nalunaaruteqanngippat, danskit naalakkersuisui uppisinneqassapput.

Danskit naalakkersuisuinut ikorfartuisut tassa De Radikalekkut juulip aallartinnerani taama piumasaqarlutik nalunaarput.

Ministeriunerullu Mette Frederiksenip (S) tamanna Socialdemokratit Odensemi aasaarnerani ullumi marlunngornermi ataatsimiinneranni erseqqissumik oqaaseqarfiginngilaa.

Ministeriuneq De Radikalekkut taama nalunaaruteqarnerat qanoq isummerfigineraa aperineqarami, partiit Folketingimi ilaasortaatitallit oqaaseqaataat tusaatissatut soorunami tigugini akivoq.

- Ingammik partiit mikinerit ikorfartuisorisatta oqaaseqaataat tusaatissatut tiguakka, taamaammat De Radikalekkut taama nalunaaruteqarnerannut soorunami naalarnivunga.

- Qinersisitsinissamik qaqugu nalunaaruteqarniarnerlunga oqaaseqarfigissanngilara. Tamannali ukiup ataatsip ingerlanerani tassa aappaagu inatsisitaarfiutinnagu pissaaq, Mette Frederiksen oqarpoq.

AAMMA ATUARUK Søren Pape Poulsen Danmarkimi ministeriuninngorusuttoq

Danskit maanna naalakkersuisui Folketingimut qinersereernermi naalakkersuisuuginnarnissaat siunertarilluinnarlugu qinigassanngorteqqissalluni, Mette Frederiksenip aamma erseqqissaatigaa.

Tasssumali danskit naalakkersuisuinut illua tungiliuttut ilaat marluk ministeriuninngorniuttussanngortut, tassa Jakob Ellemann-Jensen (V) aamma Søren Pape Poulsen (K) naalakkersuisoqatigiinnik siammasissunik pilersitsinissamik aamma isumaliuteqaqquai, ministeriuninngorniuttussanngortulli taakku marluk taamaaliorniarnatik nalunaareerput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl