Ministeriuneq Nunatsinnut tikeraalerpoq

Danmarkimi ministeriuneq Helle Thorning-Schmidt, siorna septembarimi ministeriuninngortoq, ukioq ataaseq qaangiutilillartorlu Nunatsinnut aggustip naalernerani  tikeraassaaq, Nunanut allanut tunngasunut Pisortaqarfimmi pisortaq, Inuuteq Holm Olsen taama nalunaarpoq.

Ministeriunerup pisortatigoortumik tikeraarnermi saniatigut, Naalagaaffeqatigiit, tassa Savalimmiormiut, Nunatta Danmarkillu siuttuisa ataatsimeeqatigiinnissaat pilersaarutigaa.

Ministeriunerup qanoq sivisutigisumik Nunarput tikeraassaneraa suli maannamut pilersaarusiorneqanngilaq.

Nunarput EU-mit ukiormanna aamma tikeraarneqassaaq. Danmarkip EU-mi siulittaasuuffimmik ukiormanna tigumminninnera iluatsillugu, EU-mi nunat ilaasortaasut sinniisaat, 100-it missaanniittut paasisassarsiorlutik Nunatsinnut maajip naanerani tikerassasut pilersaarutigineqarpoq. Taakku Ilulissani ataatsimeeqatigiinnerminni ilaatigut eqqartussavaat Nunatta aningaasarsiornikkut ineriartornera aamma issittumi pissutsit.

Ukiormanna Nunatta tikeraartissaasa ilagissavaat EU-p aalisarnermut kommissæria, Maria Danmarki aamma Suliffissuaqarnermut kommissæri, Antonio Tajani. Taakku Nunarput juunimi tikeraassavaat Naalakkersuisunillu ataatsimeeqateqassallutik. Nunanut allanut tunngasunut Pisortaqarfimmi pisortaq, Inuuteq Holm Olsen KNR-imut oqarpoq.