Ministeriuneq tusagassiortunik katersortitsinermini nunatsinnut Savalimmiunullu toqqaannartumik aamma kajumissaaruteqarpoq.Assi: Ritzau/Scanpix

Ministeriuneq nunatsinnut: Iluaqutaasinnaasut tamaasa atulersigit

Ministeriuneq, Mette Frederiksen (S) nunatsinni Savalimmiunilu coronavirusip ineriartornissaanut atatillugu ernumassuteqarpoq.

Ministeriuneq, Mette Frederiksen (S) Danmarkimi coronavirusip siaruaanneranut annikillisaaniarnissamut nutaanik assigiinngitsunik sulliniutinik danskit nalunaaqutaat naapertorlugu unnukkut saqqummiusseqqippoq.

Ullumikkut nalunaaqutaq quliniit tamanut ammasuni inuit qulinit amerlanerusut katersuuteqqusaajunnaarput. Tamanna Danmarkimi illup iluani silamiluunniit atuuppoq.

Ministeriuneq tusagassiortunik katersortitsinermini nunatsinnut Savalimmiunullu toqqaannartumik aamma kajumissaaruteqarpoq.

AAMMA ATUARUK Dronningi: Nalliuttorsiorneq isumaatsuliornerullunilu soqutigittaanneruvoq

- Savalimmiormiut lagmandianut Kalaallit Nunaannilu Naalakkersuisut siulittaasuannut soorunami qanimut atassuteqarpunga. Pingaartumik Savalimmiut 50.000-inik innuttaasoqartoq 47-nik tunillatsissimasoqarluni eqqugaaqqaneruvoq. Kalaallit Nunaat aamma eqqugaavoq.

- Sumiiffinni taakkunani marlunni ineriartortoqarnera ernummatigaara. Taamaammat naalagaaffeqatigiinni ilaquttatsinnut qanitatsinnut toqqaannartumik kajumissaaruteqarpunga: Iluaqutaasinnaasut tamaasa atulersigit, Mette Frederiksen oqarpoq.

Nunatsinni meeqqat atuarfii matusut timmisartullu unitsinneqartut

Danskit ministeriunerata tusagassiortunik katersortitsinerata nalaani Naalakkersuisut siulittaasuat, Kim Kielsen aamma katersortitsivoq. Tassanilu virusimik tuniluuttooqaqqunagu suliniutit nutaat atulersinneqartut saqqummiunneqarput.

Nunatsinni meeqqat atuarfii ataasinngornermit sapaatini-akunnerni marlunni matoqqatinneqassapput.

AAMMA ATUARUK Coronavirusip ernumassutigineqarnera: Atuarfiit timmisartuussinerillu matulersut

Matoqqatitsinissaq ilinniarnertuunngorniarfinnut, ilisimatusarfimmut, inuusuttut ilinniarfinulluunniit atuutinngilaq. Aamma Meeqqeriviit ulluuneranilu paaritittarfiit matuneqassanngillat - tassa ingerlaannaq matuneqassanngillat.

Tamatuma saniatigut Air Greenlandip timmisartuutai aamma nunamiiginnassapput. Tassa imaappoq nunatsinnit nunatsinnullu timmisartuussinissat tamarmik ulluni 14-ini taamaatinneqarallassapput.

Aamma illoqafiit nunaqarfiillu akornanni timmisartuussisoqartassanngilaq.

Coronavirusimik tunillatsissimasoq nunatsinni siulleq ataasinngormat uppernarsarneqarpoq. Nunatsinni allanik tunillatsittoqarsimaneranik suli nalunaaruteqartoqanngilaq

Taamaakkaluartorlu oqartussat coronamik tuniluuttoqaqqunagu sakkortuumik alloriaateqarput.

Isummersuutit