Ministeriuneq Kalaallit Nunaat pillugu apeqqutini persatarineqarpoq

Folketingip illersornissamut ataatsimiititaliaa ministerinik ullumi pulaartoqarpoq. Ministeriuneq, nunanut allanut ministeri inatsisinillu atortitsinermut ministeri Kalaallit Nunaannut tunngasunik apeqquteqarfiginiarlugit ullumi aggersarneqarput. Ministerit ulapilaavissorput, ministeriunerullu illuatungiliuttut apeqqutigisaannut tamakkiisumik akissuteqarusunnginnini pissutigalugu partiinit talerperlernit persatarineqalaavissorpoq.
februaarip 05-at 2013 12:32

Ministerit ikiortissaminnik naammattunik ilaqaraluarput, ilaatigulli Søren Espersenimit (DF), Gitte Lillelund Bechimit (V), Claus Hjorth Frederiksenimit (V) og Kristian Thulesen Dahlimillu (DF) apeqqutigineqartut imaaginnavipput.

Kalaallit Nunaanni aatsitassat pillugit apeqqutinut akissuteqarniarani ministeriunerup qanittukkut nalunaarutigigaluarpaa, isumaqarami namminersorneq pillugu inatsit naapertorlugu aatsitassat Kalaallit Nunaannit pigineqartut, taamaattumillu akissutissani inatsisitigut soqutiginaateqanngitsuusut. Taamaakkaluartorli sooq akissuteqarusunnginnersoq ministerinut apeqqutigineqaqattaarpoq. Apeqqutit taakku saniatigut aamma isumannaallisaanermut politikki Kalaallit Nunaannullu tunngatillugu pissutsit allanngornerisigut susassaqarfimmi tassani unamminartut suut pilersimanerinik ikigisassaanngitsunik aamma apeqquteqartoqarpoq. Ileqquusoq uniorluinnarlugu, ataatsimiinneq nalunaaquttap akunnerinik sisamangajannik sivisussuseqarpoq.

Ministerit illuatungiliuttullu pitsaasunik siunertaqarlutik apeqquteqaraluarput, isumannaallisaarnermullu politikkimut sillimaniarnermullu tunngatillugu paasissutissanik nutaanik tunniussoqarsinnaanera killeqarluni. Isumaqatigiinnginnerulli aqagu nangeqqinnissaanut periarfissaqassaaq, Folketingimimi apeqquteqaat tuaviuussassaq eqqartorneqartussaavoq.

Kalaallit Nunaannulli tunngasutigut, suliniutinut angisuunut inatsit, isumannaallisaanermut politikki SAR-imillu upalungaarsimaniarneq pillugu Folketingimi isumaqatigiittoqannginnera erseqqilluinnarpoq. Danskit naalakkersuisuisa allamiut pillugit inatsisiliornermi immikkut inatsisiliortoqarnissaata akuersissutigineqarnissaa, suliniutit angisuut pillugit inatsimmik aqqutissiuisussaq, Nunatsinni qinersinerup naammassinissaanut kinguartissimavaat. Tamanna akuersinngilluinnarnissamik politikkimut aamma atuuppoq, ministeriunerullumi tamatuma qinersinerup kingorna allanngortinneqarnissaa ilimaginngilaa.

Ministeriunerup Folketingip siulittaasuanut allagai ataani atuarsinnaavatit.