Ministeriuneq Frankrigimit tapersersortitaarpoq

Danmarkip ministeriunera Lars Løkke Rasmussen silap pissusaa pillugu Københavnimi ataatsimeersuarnissamut atatillugu tapersersortitaarpoq, Frankrigip præsidentianit Nicolas Sarkozymit maanna tapersersorteqalerami.
Allattoq Jaaku Lyberth
oktobarip 02-at 2009 08:35

Ministeriunerup Sarkozy ippassaq ataatsimeeqatigereerlugulu tamanna ilisimatitsissutigaa.

- Danmarkip siulittaasuunissaa Frankrigimit tapersersorniarneqartoq, Sarkozyp neriorsuutigaa. Nunat assigiinngitsut siuttuisa pimoorussillutik suliniarnissaat, New Yorkimi sapaatip-akunnerata siuliani ataatsimiittoqarmat ujartorpara, pimoorussiumasullu tassaapput Frankrigimeersut, Lars Løkke Rasmussen naqissusiivoq.

Silap pissusaata allanngoriartornerata akiorniarneqarnissaa pillugu Københavnimi ataatsimeersuarnermi isumaqatigiittoqarsinnaanissaa angujumallugu - Frankrigip siunnersuutigisaatut - immikkut ittumik novembarimi ataatsimiittoqassanersoq suli aalajangiunneqanngilaq.

Frankrigip præsidentiata Sarkozyp New Yorkimi sapaatip-akunnerata siuliani tamanna siunnersuutigaa, ataatsimiittoqassanersorli nalunarallarpoq, ministeriunerup Lars Løkke Rasmussenip Naalagaaffiit Peqatigiit siuttuat Ban Ki-moon peqatigalugu tamanna aalajangertussaammagu.