Ministerimut apeqquteqaatit arfinillit

Inatsiseqarnermut ministerip Sara Olsvigillu ataatsimeeqatigiinnerisa kingorna Sara Olsvig ministerimut apeqquteqaateqarpoq, pineqartoq Folketingemi Kalaallit Nunaat pillugu ataatsimiititaliami oqaluuserineqarpoq aamma paragraf 20 najoqqutaralugu apeqquteqaatitut ministerimut nassiunneqarlutik.  

Pineqaatissinneqarsimallutik utaqqisut isumakkeerfigineqartalernissaannik ministerip siunnersuutigisani qanoq piviusunngortinniarneraa, Sara Olsvigp ilaatigut paaserusuppaa,  Kalaallit Nunaanni eqqartuussivinni pineqaatissiisarnerni sakkortuumik pinerluuteqartut avatangiisinullu ulorianaateqartut ukiup affaanik sivisussuseqartumik pineqaatissinneqarsimasut inissiisarfiini matoqqasunut inissiisarneq atorneqartillugu.

Pineqaatissineqartut inissiisarfinnut inissinneqarnissaannut utaqqisut ajornartorsiutaanerannut piffissaq ungasinnerusoq isigalugu aaqqiissutissamik qaqugu qanorlu ministeri iliuuseqarniarnersoq, Sara Olsvigip aamma paaserusuppaa.