Ministeriap suut ilinniarneqassanersut aalajangertarpaa

Ane Karen Løvstrømip siunissaa Grønlandsministeriemiit aalajangiunneqarpoq.

- Ministeriaqarfimmiit takkutoqarpoq Ikastimi Handelskolemi atualernissannut misilitsikkiartussasunga, tassanilu atuassasunga. Taamanikkut ministeria oqarpat tassa taamaaliortarpugut, Ane Karen Løvstrøm oqarpoq.

Chrisian Berthelsenip 1960-miit 71-mut Kalaallit Nunaanni atuarfeqarnermi pisortap pissuseq ilumoornerarpaa.

-Taamanikkut Ministeriap atuarfiit peqatigalugit meeqqat piginnaasaat malillugit aalajangertarpaat sumut ingerlaqqissanersut, Christian Berthelsen oqarpoq.

Ane Karen Berthelsen allarluinnarmik ilinniagaqassalluni takorluuisimagaluarpoq.

-Nujalerisutut igasutulluunniit ingerlaqqinnissara takoloorsimagaluarpara, oqarpoq.

Takorluukkanik allaanerusumik ilinniartariaqalerneq Najaaraq Jørgensenip aamma ilisarilluinnarpaa..

- Eqqarsaraluarama nunatsinnut angerlassallunga, kisianni ministeriap aalajangerpaa ukioq ataaseq illumeeqqaassasunga, Najaaraq Jørgensen oqaluttuarpoq.

Aqqa Peter Lyberth ilinniarfissanik taamani qinigassarsuaqannginnerarpaa, misigisimavorlu ilinniarfissaasinnaasunik siunnersorneqarani.

- Oqarfigineqaannarpugut EFG aallartilerpoq soqutiginninnersugut, allamillu siunnersorneqarata, nassuiaavoq.

Taamanikkut oqartussaasunut naalannerujussuaq kalaallit akornanni ileqquusoq, Christian Berthelsen erseqqissaavoq.

- Taamanikkut tamakkununnga tunngasut aalajangerneqassagaangata naalattorujussuupput, tassa uku ilitsersuisut tatigisorujussuuaat, naggassiivoq.