- Pineqaatissiisarnerup qaffasissusaa qaffanneqarsinnaanerulerniassammat inissiisarfinni amerlanerusunut inissamik nassaarsiornermik aallartitsivunga, Hækkerup oqarpoq. Toqqorsivimmit assiAssi: Emil Helms/Ritzau Scanpix

Ministeri utaqqisuniittut pillugit: Kinguaassiutitigut pinerluuteqarsimasut utaqqiinnartarnerat ajornartorsiutaavoq

Pineqaatissinneqarsimasunut inissiisarfinni inissaqarnerulersitsinissaq sulissutigineqartoq, inatsiseqarnermut ministeri, Nick Hækkerup (S) oqarpoq. Inissiisarfimmiilernissamut utaqqisut maannakkut 64-iupput.

Kalaallit Nunaanni pineqaatissinneqarsimasunut inissiisarfinni pinerluuteqarsimasutut pineqaatissinneqarsimasut inissaqartinneqannginnerat ajornartorsiutaavoq.

Danskit inatsiseqarnermut ministeriat, Nick Hækkerup socialdemokraatineersoq taama oqarpoq.

Inuit 64-it nunatsinni pineqaatissinneqarsimasunut inissiisarfimmiittussaagaluit inuiaqatigiinni akuuginnartut maannakkut 64-iupput. Taakkumi inissiisarfinni inissaqartinneqanngillat. Utaqqisunit 64-init 25-t kinguaassiutitigut atornerluinikuupput, taakkunanngalu 15-it meeqqanut 15-it inorlugit ukiulinnut atornerluinikuullutik.

- Kinguaassiutitigut atornerluisimasutut Kalaallit Nunaanni inuiaqatigiinni akuuinnarlutik inissiisarfimmiilernissaminnik utaqqiinnarnerat ajornartorsiutaasoq isumaqatigilluinnarpara, Nick Hækkerup allappoq.

AAMMA ATUARUK MIO pineqaatissinneqarnissaminnut utaqqisut pillugit: Annilaarnaqaaq

KNR-imit ministeri apersorniaraluarparput, tamannali iluatsissimanngilaq. Tassungali taarsiullugu ministeri mailikkut allagaqarpoq. Hækkerupip inissiisarfinni inissaqarnerulernissaa sulissutigineqartoq paasissutissiissutigaa.

- Pineqaatissiisarnerup qaffasissusaa qaffanneqarsinnaanerulerniassammat inissiisarfinni amerlanerusunut inissamik nassaarsiornermik aallartitsivunga. Inissat taakku qanoq atorneqarsinnaanerat pillugu Naalakkersuisullu aalajangeeqatiginiarpakka, inatsiseqarnermut ministeri oqarpoq.

Inissanilli amerlanerusunik pissarsiniarnermik suliaqarnerup qanoq ingerlanera KNR-imit akissutersisinnaasimanngilarput.

Pinerluttunik isumaginnittoqarfik pingaarnersiuisariaqartoq

Nunatsinni pineqaatissinneqarsimasunut inissiisarfinni inissat 154-iupput.

Taamaammat pinerluttunik isumaginnittoqarfiup kikkut pineqaatissinneqarsimasunut inissiisarfimmiileqqaassanersut pingaarnersiortariaqartarpai.

Nunatsinni eqqartuussiveqarfiit toqqaannartumik inissiisoqarnissaanut imaluunniit inuiaqatigiinni akuulluni eqqartuussutip pinissaanut utaqqiinnartoqarsinnaanersoq sakkortussusilerlugu aalajangertarpaat.

AAMMA ATUARUK Kinguaassiutitigut pinerluuteqarsimasut inissiisarfimmiilernissaminnut inuiaqatigiinni akuusartut

Pinerluttunik isumaginnittoqarfiup pineqaatissinneqarsimasut meeqqanut kinguaassiutitigut atornerluisimasut pingaarnerutittarpai. Tamanna Pinerluttunik isumaginnittoqarfiup pisortaata, Naaja Nathanielsenip KNR-imit qanittumi apersorneqarami oqaatigaa.

Pineqaatissinneqarsimasunulli inissiisarfimmiinnissaminnut utaqqisoqarunnaassappat inissiisarfinnik amerlanernik pisariaqartitsisoqartoq, Naaja Nathanielsen oqarpoq.

- Siullertut inissat amerlisariaqarput, inissiisarfik inissaqarnerusoq naammanngilaq. Sulisunimmi aamma pisariaqartitsivugut, maannalu atorfinitsitsiniarnerit ajornakusoortorujussuupput.

Utaqqisunut allattorsimaffimmiittut sapinngisaq tamaat ikilisinniarlugit inissiisarfiit sapinngisamik ulikkaavinneqartartut, Naaja Nathanielsenip nassuiaatigaa.

Minister: Utaqqisunut allattorsimaffik pillugu Naalakkersuisut oqaloqatigerusukkai

Pineqaatissinneqarsimasunut inissiisarfinni nakkutilliisut akissarsiaqarnerulernissaat pillugu ukioq manna siusinnerusukkut isumaqatigiissutigineqarpoq.

Folketingimi Siumut, Inuit Ataqatigiit danskillu naalakkersuisuisa akornanni isumaqatigiinniartoqareerneratigut aningaasat nakkutilliisunut atortussanngortinneqarput.

Inatsiseqarnermullu ministerip, Nick Hækkerupip tamanna nunatsinni pinerluuteqarsimasunut inissiisarfinni nakkutilliisoqarnerulernissaanut iluaqutaanissaa neriuutigaa.

- Tamanna ilutigalugu Kalaallit Nunaanni pineqaatissinneqarsimasunut inissiisarfinni nakkutilliisut akissarsiaqarnerulernissaat pillugu isumaqatigiissut ukioq manna siusinnerusukkut isumaqatigiissutigineqartoq nakkutilliisunik amerlanerusunik atorfinitsitsinissamut qulakkeereqataanissaa neriuutigaara.

- Tamatuma sanaitigut utaqqisunut allattorsimaffiup salliutinneqarnissaa pillugu Naalakkersuisunut oqallisiginneqatiginninnissara soorunami piareersimaffigivara. Hækkerup allappoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat