Ministeri tammaaneqartoq

Allattoq Jaaku Lyberth
januaarip 11-at 2007 16:57

Naalakkersuisut siulittaasuata Hans Enoksenip ullumi ukiortaarsiorluni ilassinninneranut qaaqqusat 200-t missaanniittut nunatsinnut attuumassuteqartut peqataapput. Kisianni ukiormanna angallannermut ministerip tammarnera eqqaamaneqarnerpaassagunarpoq.

Tamakkerlutik takkupput. Naalagaaffiit assigiinngitsut sinniisui, politikerit aamma inuussutissarsiornermik kulturimillu ingerlataqartut. Tamarmik Aavaat-kkunnit erinarsorfigineqarput neriniartarfimmillu akimarpasissumit Noma-mit Illu Atlantiku-mi inissisimasumit mamartunik tamussigassinneqarlutik. Siorna aamma taama pisoqarpoq. Naalakkersuisut siulittaasuata oqalugiarnissaa aamma ileqquusarpoq tulliullunilu danskit naalakkersuisui sinnerlugit oqaaseqartoqartarluni.

Ukiormanna danskit naalakkersuisui sinnerlugit peqataavoq angallannermut nukissiuuteqarnermullu ministeri Flemming Hansen. Naalakkersuisut siulittaasuat oqalugiarmat Flemming Hansen najuuppoq – kisianni oqalugiartussanut tullinnguummat ministeri tammaaneqarpoq.

Oqalugiarnissaraluanut taarsiullugu erinarsoqatigiit Aavaat erinarsortinneqarput. Taava qaaqqusat oqaluuserisassaqalerput – sooruna angallannermut ministeri tammariataartoq?

Ministerip tusagassiisartua Jesper Damm Olsen oqarpoq ajoraluartumik kukkusoqarsimasoq.

Tassa Flemming Hansen tv-qarfimmut ingerlaqqittussaasimagami nalusimagunarpaalu oqalugiarnissani naatsorsuutigineqartoq.

- Angallannermut ministeri ajuusaartorujussuuvoq kalaallillu naalakkersuisuinut qaaqqusanullu utoqqatserluni, Jesper Damm Olsen oqarpoq.

Ukiortaarsiorluni ilassinninneq Namminersornerullutik Oqartussat Sinniisoqarfianni ukiorpassuarni pisortaq Einar Lemche peqatigalugu naggataamik ilassinninneruvoq, tassami taanna februaarimi soraarninngortussaammat. Atorfia kia atorfigilissaneraa suli aalajangerneqanngilaq.