Ministeri nutaaq peqatigalugu isumaqatigiinniarnerit ingerlaannassapput
Kalaallit Nunaanni aningaasarsiorneq siuarsarneqassappat Kalaallit Nunaata CO2-mik aniatitsinerusinnaanissaa pisariaqarsinnaasoq Nunatsinniit oqaatigineqarpoq, Københavnimilu ataatsimeersuarnermi qanorluunniit angusaqartoqaraluarpat, Lykke Friisip tamanna eqqaamasariaqassavaa.
Lykke Friis ministeritut dronningimut ullumi ilisaritinneqarpoq, isumaqatigiinniartarnissallu eqqarsaatigalugit naalakkersuisut siulittaasuat Kuupik Kleist qilanaarpoq:
- Lykke Frriis Nunatsinniit ilisimavarput, Nunatsinnilu pissutsit Lykke Friisip ilisimasaqarfigai, avatangiisinullu ministerinngorneranut atatillugu tamanna allannguuteqarnavianngitsoq naatsorsuutigaara. Sullarissorsuuvoq, ilisimasaqartorujussuullunilu, tamaattumik suleqatiginissaa qilanaaraarput, Kuupik Kleist oqarpoq.
Danmarkip Kalaallit Nunaatalu akornanni isumaqatigiinniarnerit pillugit atsioqatigiittoqartussaassaaq, Connie Hedegaardili silap pissusaanut ministeriujunnaartussaammat tamanna ernumanartoqannginnersoq Kuupik Kleist aperaarput, akivorlu:
- Københavnimi ataatsimeersuarnerup nalaani isumaqatigiissutissarput naammassisinnaassaneripput apeqqutaavoq, naammassinissaali suliniutigissavarput. Københavnimili ataatsimeersuarnerup qanoq inerneqarumaarnera suli nalunarmat imaalluarsinnaavoq ataatsimeersuareernerup kingorna aatsaat atsioqatigiittoqartoq, kisianni decembarip 18-ianni atsioqatigiittoqarataannaavoq, sulili tamanna nalunarluni, Naalakkersuisut siulittaasuat Kuupik Kleist oqarpoq. Taanna Connie Hedegaardilu unnummanna ataatsimiipput, isumaqatigiinniarnerit killiffiat matumani eqqartorneqassallutik.
