Ministeri Australiamiu tammaraluartoq ajunngitsoq nassaaraat

Ministeri Australiamiu inuilaarsuarmi qaqqami isseqisumi ullut pingasut ujaarineqareerluni ajunngitsoq nassaarineqarpoq. Aviisip Politikenip nittartagaani tamanna atuarneqarsinnaavoq.
septembarip 01-at 2009 12:02

Annaassiniartartut immikkuit sungiusakkat 80-it ministerimik maqaasineqartumik sapaatiummalli ujaasitinneqalerput. Ministeri, Tim Holding, qaqqami Mount Feathertopimi pisarnermisut pisuttuarsimavoq, angerlamulli apuutinngiinnarmat ujaaritinneqalerpoq, silapilummalli ujaasineq ajornakusoorpoq, annaassiniartartorpassuillu ajunaarsimanissaa ernummatigileraluarpaat.

Ministerili qulimiguulimmit Australiami nalunaaqutaq malillugu ullaaralaaq takuneqarpoq, timmisartumillu ingerlatsisoq oqartussaasunut kalerriivoq. Ministeri qaammartartumik qaarmioqarallartillugu qulimiguulimmi inuttat takusinnaasimavaat.

Tim Holding Melbourne-mi napparsimmavimmut nalunaaquttap akunneri pingasut qaangiummata apuunneqarpoq - ulluni pingasuni 0 gradip missaanik issitsigisumiissimanera eqqaassagaanni tupinnaannartumik ajunngitsoq.

Ministeri qaqqami innaaqqissukkut 100 meterit missaanniit quaalluni nakkarami annikitsuinnarmik kimillatsitersimanermi saniatigut allamik ajoqusersimanngilaq.