Camp Century: Ministereqarfiup kilitsissiaasimanerartoq oqaaseqarfigerusunngikkaa
Illersornissamut ministereqarfiup allagaateqarfimmini misissuinera taama inerneqarpoq.
Danskeq 83-inik ukiulik Erik Jørgen-Jensen, DR-ip radiukkut aallakaatitassiaani upernaaq sammineqarpoq, Amerikamiut Sermersuup iluani sakkutooqarfianni Camp Centuryimi 1960-imit 1963-imut sulinerminik sukumiisumik oqaluartinneqarluni.
AAMMA ATUARUK Danmark Camp Centurymi kilitsissiaqarsimasoq
Erik Jørgen-Jensen nammineq oqaluttuarpoq sakkutooqarfimmi pissutsit pillugit nalunaaruteqartartussatut illersornissamut qullersaqarfiup isertortumik paasiniasartuinit aallartitatut sulisimalluni.
Nunanut allanut tunngasunut ministereqarfiup allagaateqarfiani Erik Jørgen-Jensen pillugu paasissutissanik nassaassaqanngitsoq danskit nunanut allanut tunngasunut ministeriata Anders Samuelsenip ukioq manna maajip qaammataani isumasioqatigiissitsinermi oqaatigaa. Illersornissamulli ministereqarfik peqquneqarpoq angut pineqartoq pillugu paasissutissanik allagaateqarfimmini peqarnersoq misissuissasoq.
AAMMA ATUARUK Danskit kilitsissiaqarsimanerat Samuelsenip ilisimasaqarfiginnginnerarpaa
Misissuinerlu taanna maanna naammassineqarpoq. Illersornissamut ministereqarfiup KNR-imut mailikkut ilisimatitsissutigaa Erik Jørgen-Jensenip sakkutuujusussaanini piffissami 1957-imit 1958-imut naammassigaa.
Ilanngullugulu oqaatigineqarpoq: ”Tuk Erik Jørgen Jensenip Pituffimmi atorfeqarneranut tassaniinneranullu pissutsit allat Illersornissamut ministereqarfiup oqaaseqarfigeqqissinnaanngilai, atorfeqarnermut tunngasut Illersornissamut qullersaqarfiup Isertortumik paasiniaasartuinit nalinginnaasumik oqaaseqarfigineqarneq-ajormata.”