Pituffik: Ministereqarfik USA-mut isumaqatigiinniarnerni paamaarussisimaneraraat

Pituffimmi kiffartuussinissamik isumaqatigiissutip 2014-imi suliariumannittussarsiuunneqarnerani ajorsartut, danskit nunanut allanut tunngasunut ministereqarfiata USA-mut isumaqatigiinniarnerata qanoq ingerlasimanera pakatsissutigaat. Kingornami Nunatta, Danmarkip USA-llu ataatsimeeqatigiittarnerat sukkut tamaannaannaq pisarsimapput, allagaatini nunanut allanut tunngasunut ministereqarfimmeersuni tamanna erserpoq.

Nittartagaq Finans.dk taama allaaserisaqarpoq.

Danskit nunanut allanut tunngasunut ministererisimasaat Martin Lidegaard, suleqatigiissitanik marlunnik diplomatinik Danmarkimit, Nunatsinnit USA-miillu peqataaffigineqartunik 2015-imi upernaakkut pilersitsivoq. Suleqatigiissitanut suliakkiissutigineqartoq tassaavoq Pituffimmi kiffartuussinissamik isumaqatigiissutip suliariumannittussarsiuuteqqinneqarnissaa tamatumunngalu malittarisassanut nassuiaasiornissaq.

Maannali - ukiut marluk affarlu qaangiunnerini - suleqatigiissitat marluusut suli tusarfigineqanngillat.

AAMMA ATUARUK GC ukiuni 46-ni Pituffimmi sulereerluni qimappaa

Finans.dk-ip nunanut allanut tunngasunut ministereqarfimmut allagaatinik takunnikkumalluni noqqaassuteqarneratigut takuneqarsinnaavoq Kunngeqarfiup USA-llu akornanni allaffigeqatigiinneq 2016-imi ukiup affaani kingullermi uninngasimasoq. Ukioq mannali januaarimi februaarimilu attaveqaqatigiinnerusimapput, aamma suleqatigiissitat maajimi marloriarlutik, septembarimilu naapeqatigiissimapput, Finans.dk taama allappoq.

Nunanut allanut tunngasunut ministerip Anders Samuelsenip sulinerup sivisunaarnera ilaatigut USA-mi præsidentimut siorna qinersisoqarneranik pissuteqarnerarpaa.

- Sukkasuumik sulisoqanngilaq. Septembarimi kingullermik ataatsimiippugut. Amerikami naalakkersuisut qaammatit aqqanillit qaangiuteeraluartut suli inissivissorsimannginnerannut aamma attuumassuteqarpoq. Tassa piviusoq taamaappoq, Samuelsen oqarpoq.

AAMMA ATUARUK USA: Pituffimmi kiffartuussinerup ukiut 1-3 qaangiuppata suliarimannittussarsiuuteqqinnissaa ilimanarpoq

AAMMA ATUARUK Lidegaardip Kerry oqaloqatiginiaraa

Pituffimmi kiffartuussinissamik isumaqatigiissut ingerlatseqatigiiffimmit amerikamiunit pigineqartumit Exelis Services A/S-imit ukioq manna oktobarip aallaqqaataani tunniunneqarpoq. Ingerlatseqatigiiffiit Greenland Contractors, Copenhagen Arctic aamma Per Aarsleff USA-mi ukiuni arlalinni eqqartuussissutigut suliassanngortitsinerisa kingorna tamanna pivoq.

Ingerlatseqatigiiffiit Per Aarsleffip Greenland Contractorsillu inatsisitigut ilungersuuteqarnertik unitsiinnarsimavaat,  Copenhagen Arcticilli ilungersuuteqarnini ingerlatiinnarpaa.

Ingerlatseqatigiiffinnili pingasuusuni pisortaasut nunanut allanut tunngasunut ministereqarfiup suliap ingerlanerani naammassisai pakatsissutigaat.

- Isumaqatigiissutip inatsisitigut annaaneqarnera nassuerutigereerparput, politikkikkulli qanoq iliorsinnaassuseqarneq akuliunnerlu neriuutigisimasaraluarput takusaqarfigivallaanngilarput, Greenland Contractorsimi pisortaq, Peter Kofoed, taama oqarpoq.

AAMMA ATUARUK Isumaqatigiinniarnerit kigaappallaarnerat isornartorsiorneqartoq

 

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat