Mininnguaq Kleist nunasiaataasimasumut paasisassarsiorpoq

Mininnguaq Kleist Atlantikup Avannaani Suleqatigiinni allattaasoq, New Zealand-ip eqqaanniittunut qeqertaarannguanut Cook Islands-inut paasisassarsioqqammerpoq.

Cook Islands 18.000-inik inoqarput, qeqertaapput New Zealand-imut nunasiaataasimasut. 1965-imi New Zealandimut suli atagaluarlutik namminneq tunngaviusumik inatsiseqalerput. Namminneq inatsiseqalernerat isumaqarpoq, namminneq nunaminnut piginnittuulernerannik taamalu aamma nunanut allanut namminneq politikkikkut oqartussaalernerannik.

Mininnguaq Kleist-ip Cook Islands-imiinnermini inuppaalussuit ataatsimeeqatigai, ilaatigut nunanut allanut ministeri, timersornermut ministeri, inatsisilerinermut professori, naalagaaffiit pissusiinik professori sillimaniarnermullu ministeriaqarfimmi atorfilik.

- Cook Islands IOC-mut ilaasortaavoq, tassa Olympiade-mut peqataasinnaallutik. Cook Islands-ip vicepræsidentiata naapisimaarnerani oqaluttuarpoq, IOC-mut ilaasortaaleramik IOC-mit aningaasanik taperneqartalersimallutik, Cook Islands-imiullu tamanna timersornikkut assut qaffassaatigisimagaat, Mininnguaq Kleist oqaluttuarpoq.

Mininnguaq Kleist Cook Islands-imut angalanini assut pissarsiaqaatigisimavaa, maannalu nalunaarusiorpoq Atlantikup Avannaani Suleqatigiit iluanni atugassamik.