Minik Rosing nersornaasigaavoq

novembarip 07-at 2005 17:52

Danmarkimi Det Grønlandske Selskab sapaatip akunnerata naanerani ukiunik 100-nngortorsiorluni nalliuttorsiorpoq.

Nalliuttorsiorneq malunnartinniarlugu Københavnimi Moltkes Palæmi arfininngormat unnukkut nereqatigiittoqarpoq. Nereqatigiinnermi peqataasut 275-it akornanni Kunngissaq Frederik aamma nereqataavoq. Kunngissaq Det Grønlandske Selskabimut illersuisuuvoq.

H.J.Rinkip nersornaataa, Nunarput nunatsinniluunniit pissutsit pillugit inummut suliniuteqartumut tunniunneqartartoq, nereqatigiinnerup nalaani Kunngissap Frederiup tunniuppaa.

Danskit naalagaaffiata katersugaasivissuani, Statens Naturhistorisk Museumimi, ilisimatooq, Minik Rosing, Nersornaammik tigusisuuvoq.

Minik Rosingip nunatsinni ilisimatusarnini kalaallillu inuusuttut ilinniaqqinnissaannut kajumilersitsisimanini pillugit nersornaaserneqarpoq.

Qeqertarsuarmi misissuinermini ilinniarnertuunngorniat pinngortitap misissorneqartarneranik pikkorissarpai.

Nunasiaanerup nalaani niuertut Brummerstedt, Knuthsen aamma Müller Danmarkimut Nunatsinniit angerlarmata Det Grønlandske Selskab ukiut 100-t matuma siorna 1905-imi pilersinneqarpoq.

Nunarput nunatsinnilu pissutsit ilisimannittoqarnerulernissaq anguniarlugu Det Grønlandske Selskab pilersinneqarpoq.

Taamaalilluni nunatsinni pissutsit oqallisaaneranni pingaaruteqarluinnartuuvoq. Ullumikkut Selskab 1064-inik ilaasortaqarpoq.