Minik Rosing kunngikkormiunit nersornaaserneqarpoq
Nersornaat taanna Dronning Margrethep Prins Henriullu aningaasaateqarfianit tunniunneqartarpoq.
Kunngikkormiut nittartagaani Kongehuset.DKimi allassimavoq.
Nersornaat 100.000 koruuninik aningaasartaqartoq Dronning Margrethe-mit Prins Henrikmillu ullup qeqqata siorna tunniunneqarpoq kunngikkormiut illussaarsuanni Amalienborg-imi.
Nunat tamat issittup ukiorititaanut atatillugu Kalaallit Nunaanni ilisimatuussutsikkut misissuinerni nuimasut ilaannik nersornaasiisoqarnissaq aningaasaateqarfiup siulersuisuisa aalajangerpaat.
Minik Rosing Nuup avannaata kangiani Isukasiani nunarsuup sananeqaataa pillugu ilisimatuussutsikkut misissuisimanera pillugu nersornaaserneqarpoq. Isukasiani Minik Rosingip misissuinermini uppernarsarpaa, nunarsuarmi qangarsuarli uumassuseqartoqartarneranik oqaatigineqartartoq suli siusinnerusukkut pisimassasoq. Ilisimatooq alla kunngikkormiut nersornaasiuttagaannik nersornaaserneqartoq tassaavoq Dorthe Dahl-Jensen, taanna tunup avannaani sermersuarmi qillerilluni ukioq 2011-ip tungaanut suliniarpoq, sermersuarmi 3000 meterinik itissusilimi paasiniarniarpaa ukiuni kingullerni 130.000-ini silap pisussaata qanoq issimanera. Dronning Margrethep Prins Henriullu aningaasaateqarfiata siulersuisuisa ukioq 1972-imi aalajangerpaat nersornaat Amalienborgip nersornaasiuttaagaannik pilersitsinissaq.
Amalienborg-ip nersornaasiuttagaanik nersornaaserneqartut annertuumik ilisimatuussutsikkut misissuisut qiimmassarneqarnissaannik siunertaqarpoq. Nersornaasiisarneq piffissani assigiinngitsuni tunniunneqartarpoq, kingullermik nersornaammik tunniussisoqarpoq ukioq 2005-imi.
