Minik Rosing: Kinamiut ersigissanngilagut
Suleqatigiissitap suliassaasa pingaarnersarissavaat, aatsitassarsiorfinni Kinamiunik sulisoqarniarneq pillugu, Danmarkip Nunattalu Kinamiunik qanoq suleqatigineqarsinnaanerat erseqqissassallugu.
- Kinamiunik sulisoqarnissamik eqqarsaatit Kinamiullu aningaasaliinissaat Nunatta ulorianartutut isigisariaqanngilaat, professori Minik Rosing, suleqatigiissitami siulittaasunngortussaq, aviisimut Berlingske Business-imut taama oqarpoq nangillunilu ima oqarluni.
- Nassuerutigisariaqarporli Kinamiunik sulisoqarnissaq isumakulunnarsinnaammat taamaattumillu eqqarsarluarluta paasiniartariaqarparput, Nunatta Danmarkillu kineserit piginnaasaat qanoq atorluarneqarnissaat eqqarsaatigilluassallutigu, Minik Rosing oqarpoq.
Taanna aamma isumaqarpoq, Nunarput avammut ammasuusariaqartoq, kineserinillu suleqateqarnissaq ammaanneqartariaqartoq isumaqarluni. Minik Rosingip Nunatta naalakkersuisui isumaqatigigai, tassa Kinamiut Nunatsinnut aningaasaliinissaat siunertaralugu naalakkersuisugut ukiuni kingullerni suliniuteqarneri isumalluarnartoqartikkamiuk.
- Tusagassiutini eqqartorneqartarpoq, qanoq iliornikkut Kineserinik suleqateqarnissamik eqqasaatit pinngitsoortinneqarsinnaaneri. Eqqaamaneqartariaqarporli ilisimassallugu, Kina nunarsuatsinni aningaasarissaarnerpaat ilagilernikuummassuk aamma eqqaamaneqartariaqarpoq, Canadami iluatsilluartumik Kinmamiut aningaasaliineri atorluarneqarmata, Minik Rosing oqarpoq.
Canadap issittortaani suliniutinut assigiinngitsunut arlalinnut Kinamiut aningaasanik milliardilikkaanik aningaasaliisareerput, taamatullu nunarsuatsinni nunani siuarluarsimasuni aamma taamaaliortareerlutik soorlu Australiami Afrikamilu nunani arlalinni.
- Canadap aatsitassarsiorneranut uuliasiorneranullu Kinamiut aningaasaliineri canadamiunit aqulluarneqarpoq. Canadamiullu misilittagaat Nunatta Danmarkillu ilinniarfigilluarsinnaavaat, porfessor Minik Rosing aviisimut Berlingske Businessimut oqarpoq.
Københavnip Universitetianit aamma Nunatsinni Ilimmarfimmit, Minik Rosing toqqagaalluni suleqatigiisitami ilisimatuunik inuttaqartunik suligasuartussami, aqagu tallimanngornermi siulittaasunngortinneqassaaq.
