Minik Rosing Folkemødemi nersornaaserneqartoq – Akileriilluni oqaloqatigiinneq 2025

Akileriilluni oqaloqatigiinnermut nersornaat 2025 tallimanngornermi Ujarassiuumut Minik Rosingimut tallimanngornermi nersornaasiunneqarpoq. Nersornaat pingaarutilimmik isummertarneranut tunngatillugu  tunineqarpoq – pingaartumik Kalaallit Nunaata Danmarkillu akornanni attaqatigiinneq pillugu, kiisalu Naalagaaffeqatigiinnerup siunissaa pillugu oqallittoqartillugu.

Nersornaat tallimanngornermi ullaakkut Hovedscenemi tunniunneqarpoq. Ukiumut ataasiarluni inummut imaluunniit suleqatigiissitsisartunut nersornaasiisoqartarpoq – ukuusunut: inuit innuttaaqatigiinnermut ataatsimoortitsisumik, soqutiginnittumik aammalu inummut ataqqinnittumik oqallinnermut peqataasinnaasunut.

Aaliagiisartuni ilaasortat Rosingip piginnaasai makkuusimasut nersorpaat: oqallinnermut paasisimasaqarnermik, erseqqissaarnermik aammalu paasinninnissamik aallaaveqartumik peqataasinnaanera –  Naalagaaffeqatigiinnermi Kalaallit Nunaata inissisimaneranut tunngatillugu sammisanik oqaluuserinninnerit immikkut taaneqarput.

Nersornaat tassaavoq immikkut ittumik eqqumiitsuliaq – Cille P. Grosellimit ilusilersugaq – aammalu periarfissaq pingaarutilik: Folkemødet 2026-mi Hovedscenemi aaqqissuussinissamut periarfissaq.

Minik Rosing Københavns Universitetimi ujarassiuutut ilisimatuujuvoq, nunarsuarmilu ilisimaneqarlualerpoq 1999-imi, inuunerup nunarsuarmi pileqqaarneranut tunngatillugu ilisimatuussutsikkut uppernarsaasimagami: inuuneq siusinnerusukkut naatsorsuutigineqartumit ukiut 300 millionit siusinnerusukkut aallartissimasoq – tassa ukiut 3,7 milliardit matuma siorna aallartissimammat.

Kingornalu assigiinngitsunik nersornaaserneqartarsimavoq, kingullermik Ilisimatusarfimmit 2023-mi soraarummeernerminik nersornaaserneqarpoq – ilisimatusarnermigut Kalaallit Nunaannut pingaaruteqarluinnarmat.

Ukiuni kingullerni Minik Rosing-ip misissorpaa kalaallit marraata – sikuap aanneranit pilersimasoq – nunalerinermut qanoq iluaqutaasinnaanera, pingaartumik nunaqarfinnut kiattormiuusunut. Misissuinera taanna tunngavigalugu piviusulersaarummik filmiliarineqarpoq Magic Mud, filmfestivalimii siullermeerluni CPH:DOX 2024-mi takutinneqarpoq.

Akieriilluni oqaloqatigiinnermi siusinnerusukkut nersornaaserneqarsimasut ilagaat 2021-mi nersornaaserneqartoq Aaja Chemnitz Larsen.

Dansk Ungdoms Fællesråd, Dansk Folkeoplysnings Samråd, Foreningen Folkemødet kiisalu DR-ilu suleqatigiinnerisigut nersornaasiineq ingerlanneqartarpoq.