Minik Rosing ataqqinaammik nersornaaserneqartoq
Nersornaasiunneqartartoq ilisimatusartunut inuunerup nunarsuullu qanoq inneranik nutaamik ilisimasaqalersitsisimasunut tunniunneqartarpoq. Minik Rosingip Nuup eqqaani Isukasiani ujaranngornikunik misissuinermini ukiut 3,8 milliardit matuma siornaneersoq nassaaraa tamannalu nersornaaserneqarneranut tunngavigineqarpoq.
- Minik Thorleif Rosingip misissuinerata nunarsuup silaannaata piffissami tassani qanoq issimaneranut paasisimasat allanngortippai, taassuma gassit kianneruleriartortitsisartut pissutaallutik nunarsuaq kiammik immini uninngatitsinerarlugu ilimasuut ilumuunginerarpaa. Killormuuanillu nunarsuarmi CO2-p ukiut 3,8 milliardit matuma siorna annertussusaa ullumikkutulli iinnartoq takutippaat, nersornaasiisartut tunngavilersuillutik allapput.
Nersornaat, H.C. Ørsted suliffeqarfimmit H.C. Ørstedimit Langeland Kommunemiillu ukiut tamaasa tunniunneqartarpoq. Nersornaatip saniatigut 10.000 koruunit eqqumiitsuliarlu "Sommerfugl" tassa Pakkalugaq eqqumiitsuliortumit Langelandimi najugalimmit, Sabine Majusimit suliarineqartoq tunniunneqarpoq.
