Mingutsitsisut Antuup saleeqquai
Uuliaarluinnerit, saffiugassat oqimaatsut allallu mingutsitsinerit salinneqarnissaat piiarneqarnissaallu, Nunatsinnit piumasarineqartut Qallunaat illersornissaq pillugu oqartussaannit itigartinneqarallarpoq.
Tamanna pillugu oqaloqatigiinnerit siulliit pissapput tallimanngornermi augustip 31-anni, Avatangiisinut Naalakkersuisoq, Anthon Frederiksen qallunaallu illersornissaq pillugu ministeriat Nick Hækkerup ataatsimeeqatigiilerpata.
Nunatsinnit piumasarineqartut ersaripput.
- Avatangiisit pillugit inatsit Nunatsinni tamani atuuppoq aamma illorsornissaq pillugu radareqarfinni Nunatsinniittuni. Tamannalu tunngavigalugu Qallunaat illersornissamut oqartussaasut piiaasussaatitaanerat avaqqunneqarsinnaanngilaq, atuagassiamut Ingeniørenimut Anthon Frederiksen oqarpoq.
Sumiiffinni mingutsitsinerujussuit annertuut 87-it ilisimaneqarput taakkulu saniatigut allat mingutsitsinerit annikinnerit 540-it ilisimaneqarlutik. Avatangiisit mingutsinneqarsimasut amerlanerpaartaat amerikamiut radareqarfiini pisuupput.
- Amerikamiut qimagutereernerisa kingorna qallunaat oqartussaasuisa qimaannarneqarnissaat akuerisimassagaat ilimagaarput, ilimagalutigulu tamakku kingusinnerusukkut salinneqarumaartut, Anthon Fredriksen oqarpoq.
Mingutsitsinerit nunamut annertunermut siaruaatissappata, aatsaat salinneqarsinnaasut Qallunaat illersornissaq pillugu oqartussat nalunaarutigaat.
- Uagut mingutsitsisuusimagutta saliissaqqaarpugut, kisianni aatsaat sumiiffik qimakkutsigu, illersornissaq pillugu oqartussani aamma taakku sinnerlugit Kalaallit Nunaanni avatangiisit pillugit akisussaasuusoq, Birgitte Weber Blicher atuagassiamut Ingeniørenimut oqarpoq.
