Mingutsitsisoqarsinnaanera aarleqqutigineqarpoq
Kalaallit Nunaanni uuliasiornissarsuaq isumalluarnaraluartoq avatangiisinut mingutsitsinermik kinguneqarsinnaanera aarleqqutaavoq.
Pinngortitami mingutsitsineq qanoq annertutigisinnaanersoq, Danmarkimi Avatangiisinut misissueqqissaartarfiup DMU-p Pinngortitaleriffik suleqatigalugu misissuiffigaa.
Qeqertarsuup kitaani uuliaqarneranik misissuinermi uuliamillu qalluilernermi uuliaarluernerit imartamut mingutsitsingaatsiarsinnaanerat, misissuinerit siulliit takutereerpaat. Uuliaarluernerup sumorujussuaq sarfaassaasinnaanera eqqarsaatigalugu, mingutsitsinerup immami uumasoqassutsimut innarliisinnaassusia ilimanaateqarsinnaaqaaq.
Timmissat miluumasut imarmiut, aalisakkat raajallu, Qeqertarsuup tunuani inuulluutaalluartut tassani pineqarput.
Mingutsitsinerup saniatigut pinngortitarsuarmut akornutaassapput nipiliornerit, soorlu immap naqqanik sajuppillatsitsisarnerit, qillerinerit qulimiguulinnillu angalanerit assigisaallu.
Ukiuunerani qilalukkat, arferit assigiinngitsut puisillu akornusersorneqarsinnaapput, naatsorsuutigineqarporli uumasut Qeqertarsuup kitaaniinneranni uuliasiorneq unitsikkallarneqartassasoq.
Immap naqqanik sajuppillatsitsilluni misissuinerit aamma qaleraleqarfinni aalisakkanik nigortitsigallarsinnaasorineqarput, raajalli akornusersorneqassangatinneqanngillat.
Arferit nipimit akornusersorneqarnermikkut aamma ingerlaarfimminnik allanngortitsigallarsinnaassasut, misissuinerit takutippaat.
Norgemi misilittakkat aamma takutippaat immap naqqanik sajuppillatsitsinerni, aalisakkat suaat allallu uumassusillit minnerit suffisarfinniittut toqunneqartartut, naatsorsuutigineqanngilarli nunatsinni taama pisoqarnissaa.
Uuliamik qillerivissuarni uuliamik tissaluttoqalissagaluarpat imaq sinerissami Diskollu eqqaani 100 kilometerisut isorartutigisoq mingutsinneqarsinnaavoq. Taamaattumik uuliasiulernermi upalungaarsimaneq malittarisassat malillugit ingerlanneqassasoq sakkortunerpaamik inassutigineqarpoq.
Ilisimaneqarpoq imartat sikuusartut mingutsinneqarnermik kingorna sivisunerujussuarmik ileqqutoqqaminnut uterniartarnerat. Sikummi saatsersut uulia sumorujussuaq siaruarsinnaasarpaa.
Aamma ilisimaneqarpoq uuliasiorfiit CO2-mik annertorujussuarmik aniatitsiviusartut, assersuutigiinnarsinnaavarput Norgemi uuliasiorfiit nukissiuutinik atuinermikkut CO2-mik aniatitaat, nunatsinni tamarmi CO2-mik aniatitat marloriaatigigai.
Naak nunatsinni uuliamik qalluinermik misilittagaqartoqanngikkaluartoq, misissuinermi issittup nunartaani imartaanilu misilittakkat qissimigaarneqarsimapput, taamaattumillu uuliasiorneq aallartippat piffissami uumasunik akornusersuinnginnerpaaffimmi suliat ingerlanniarneqartarniarput.
Avatangiisinut misissueqqissaartarfiup DMU-p Pinngortitaleriffiullu misissuinitik nangissavaat, ilaatigut Qimusseriarsuup avataani uuliasiornerit avatangiisinut sunniutai malittareqqissaarneqassallutik.
