Mingutsitsisoqarsimanersoq ilisimaneqanngilaq
Umiarsuup assartuutip Orasilap sapaatip-akunnerata naanerani ikkarlinneranut atatillugu qanoq annertutigisumik mingutsitsisoqarsimanersoq, anorersuarnera pissutigalugu Qaqortumi qatserisartunit sukumiisumik suli paasineqanngilaq.
Allattoq Louise M. Kleemann
Orasilap kaanngartinneqannginnerani Namminersornerullutik Oqartussat isumaqatigiissuteqarfigineqarput timmisartup orsussaa 40 tons imaanut iginneqassasoq.
- Anorersuarnera pissutigalugu orsussap tissorsimanissaa neriuutigaarput, tamannali qulakkeersinnaanngilarput, qatserisartut ittuat, Peter Erik Thomsen, oqarpoq.
Taassuma ilisimatitsissutigaa timmisartup orsussaa imaanut iginneqaraangami saattunnguanngorluni siaruaattartoq, tissorlunilu. Kangerlunnulli tissukarsimaguni issuninngortarpoq, taamaattoqaraangallu qallorneqarsinnaangortarluni.