Mingutsitsisoqarnera ulluni arlalinni ilisimavaat

Station Nordimi, tunup avannaaniittumi, orsussamik tankimut nuussiniarnermi ajortoortoqarneratigut orsussaq 22.000 liiteri tamaangaannaq aniatinneqarpoq.
Tankit ulikkaaqqareersut orserniarnerini uuliamik aniasoortoqarsimasoq, Kangilinnguit sakkutooqarfiani sakkutuut allaffianni pisortap Jan Bøgstedip oqaatigaa.

Tanki Station Nordimiittoq timmisartumit Pituffimminngaanneersumit apriilip aallaqqaataani orserneqarpoq, ajutoornerlu apriilip pingajuani aatsaat paasineqarluni.
Silap ajornera pissutaalluni ajutoorneq kingusissukkut aatsaat paasineqartoq, Jan Bøgstedip oqaatigaa.

- Station Nordimi sapaatip akunnerata naanerata nalaani 20-t 30-llu missaannik issippoq anorlingaatsiarlunilu. Taamaattumik tankit nakkutiginiarneri ajornakkusoorlutik, Jan Bøgsted oqarpoq.

Tassani sulisut massakkut saliipput, ikiuuttussanillu aamma tikittoqassasoq, Jan Bøgstedip oqaatigaa.

Uuliap apummut tiggussimanissaa sakkutooqarfimmit ilimagineqarpoq, aputillu aannginnerani, tassa maajip qeqqata missaa tikitsinnagu, mingutsitinerup aputaajaanikkut piiarneqarsinnaanissaa naatsorsuutigineqarpoq.

Mingutitsinernut annikinnerusunut piiaatit taamaallaat Station Nordimi pigineqarput, taamaattumik atortussanik allanik tikisitsisoqassasoq, Jan Børgstedip oqaatigaa.

- Ajutoorneq sumik tunngaveqartoq ilisimanngilarput. Tamannalu paasiniarlugu maanna misissuisoqaleruttorpoq, Jan Børgsted oqarpoq.
Uuliamik mingutsitsinerup saliinerullu kinguneriumaagai aggustimi sila atorsarorneruppat nalilersuiffigineqassasut oqaatigineqarpoq.
Minngutsitsinerup salinnissaa Illersornissaqarfiup akisussaaffigaa.