Mingutsitsinerup nannut innarluuteqalersippai

Tunumi nannut 100-t missaanniittut misissuiffigineqarmata paasineqarpoq avatangiisinik mingutitsinerup kingunerisaanik nannut siunissami kinguaassiorsinnaanerat ajorneruleriartussasoq. Nannut kinguaassiutaasa angissusaat avatangiisit mingutsinneqarnerannit sunnerneqartarput; mannissaasa anisuuisalu pitsaassusaat ajorsiartorpoq.

Danmarkimi avatangiisinik misissueqqissaartarfimmi, Dansk Miljøundersøgelsemi, ilisimatuut Tunumi nannunik 1990-miit 2001-p tungaanut malinnaallutik paasissutissanik katersisimapput. Avatangiisinik mingutitsinerup kingunerisaanik nannut siunissami kinguaassiorsinnaanerat ajorneruleriartussatoq atuagassiami Environment, Science & Technology-mi Danmarkimilu avatangiisinik misissueqqissaartarfiup nittartagaani, dmu.dk-mi, avammut saqqummiunneqarpoq.

Nannut 1990-imiit 2001-ip tungaanut malinnaaffigineqarneranni akuutissat arrortikkuminaatsut nannut orsuinittut milliartulersimasut paasineqarpoq. Paarlattuanilli nannup saarngini akuutissat arrortikkuminaatsut amerliartulersimapput. Tamanna Danmarkimi avatangiisinik misissueqqissaartarfiup nittartagaani atuarneqarsinnaavoq. Nannut nerisaasa silaannaallu allanngoriartornera sunneqataasimassasut ilimagineqarpoq.