Mingutsitsinerup annikillisarnissaa pilersaarusiorluarneqalerpoq
Ajorpoq! Suliareqqitassaavoq! CO2-mik mingutsitsinerup annikillisarneqarnissaanut naalakkersuisuusimasut pilersaarusiornerat pillugu Inuit Ataqatigiit tunuliaqutaralugit Inatsisartunut ilaasortaasimasoq, Marie Fleischer, taama aalajangersimatigisumik oqarpoq.
Silap pissusaanut tunngasut Naalakkersuisut siulittaasuata naalakkersuisoqarfianut maanna nuunneqarnikuuvoq, Kuupik Kleistilumi parteeqatigisimasami oqaaserisimasaanut tatiginnippoq.
- Taamaatiinnagassatut isikkoqaraluarpoq, uagullu amigaateqarpallaarsoraarput. Soorlu immikkuullarissunik suliniutinillu annertunerusunik pilersaarusiornerit amigaataapput. Tamakku misissuataassagunarpavut, Kuupik Kleist Sermitsiap nittartagaanit taama issuarneqarpoq.
Inuussutissarsiutillit CO2-mik mingutsitsinerminnik millisaaniarlutik peqataaniarnerat Naalakkersuisut siulittaasuata pingaartumik maluginiarpaa. Royal Greenland Radioaviisimut siusinnerusukkut oqarpoq, pisortat aningaasaliissutaat CO2-mik aniatitsinnginnerusunik nassaarniarnermut atorneqartariaqartut.
Royal Arctic Linelli umiarsuit CO2-mik mingutsitsinerisa nunarsuaq tamakkerlugu akileraaruserneqartalernissaat ajorinngilluinnarpaa.
Kuupik Kleist aamma isumaqarpoq, inissialiorneq eqqakkanillu isumaginninneq misissuiffigineqartariaqartut.
- Pilersaarusiat misissoqqissaarneqarumaarput, Kuupik Kleist Sermitsiap nittartagaanit taama issuarneqarpoq.